एजेन्सी । विगत ५ वर्षदेखि चलिरहेको कंगना रनौत र जावेद अख्तरबीचको मानहानीको मुद्दा शुक्रबार सकिएको छ । अभिनेत्रीले मुम्बईको बान्द्रा अदालतमा जावेदसँग माफी मागेकी छिन् । उनले बयानमा भनिन्, ‘मेरो कारणले उहाँ (जावेद) लाई पर्न गएको असुविधाको लागि म माफी चाहन्छु।’
जावेदले अभिनेत्री विरुद्ध २०२० मा मानहानीको मुद्दा दायर गरेका थिए । अभिनेत्रीले एक अन्तर्वार्तामा क्रिश ३ मा जावेदले उनलाई राकेश रोशन र उनको परिवारसँग सम्झौता गर्न भनेका बताएकी थिईन् । त्यो बेला कंगना र ऋतिकको अफेयरलाई लिएर विवाद चलिरहेको थियो ।
कंगनाले सामाजिक सञ्जाल इन्स्टाग्राममा एउटा स्टोरी सेयर गर्दै लेखेकी छिन्, ‘आज जावेद जी र मेरो मानहानीको मुद्दामा मेलमिलाप भएको छ । जावेद जी एकदमै राम्रा छन् र उनी पनि निर्देशकका रूपमा मेरो अर्को फिल्मका लागि गीत लेख्न राजी भएका छन् ।’
बान्द्रा अदालतमा एक घण्टासम्म सुनुवाई चलेको थियो । यस क्रममा रनौतका वकिल रिजवान सिद्दीकी र अख्तरका वकिल जयकुमार भारद्वाजले बहस गरेका थिए । सोहि क्रममा रनौतले भनिन्, ‘त्यतिबेला गलत बुझाईका कारण बयान दिएको हो । म फिर्ता लिन्छु।’
यस्तै, सिद्दिकीले भनेका छन्, ‘हामी लामो समयदेखि मध्यस्थताको खोजीमा थियौँ । हामीले एकअर्कासँग ड्राफ्टहरू पनि साझा गर्यौं। अन्ततः, हामीले मुद्दा हल गर्यौं। कुनै समस्या थिएन, केवल शब्दहरू मिलाउनु पर्ने थियो, जुन आज भयो। हामीले मस्यौदा तयार गर्यौं, हस्ताक्षर गर्यौं र आज दुवै मुद्दा फिर्ता लिइयो।’
पूरै मामिला के हो ?
२०२०ः कंगना रनौतले सुशान्त सिंह राजपुतको मृत्यु पछि एक टिभी च्यानललाई दिएको अन्तर्वार्तामा महेश भट्ट, करण जोहर र जावेद अख्तरलाई आत्महत्या गर्ने गिरोह भनेकी थिइन् । केही समयपछि कंगनाले पिंकभिलालाई दिएको अन्तर्वार्तामा जावेद अख्तरले आफू र ऋतिक रोशनबीच विवाद हुँदा जावेदले उनलाई घरमा बोलाएर धम्की दिएको बताएकी थिइन् । उनले भनेकी थिईन् , ‘जावेदले मलाई राकेश रोशन र उनको परिवार निकै शक्तिशाली रहेको बताए । यदि तपाईंले तिनीहरूसँग माफी माग्नुभएन भने, तपाईंसँग भाग्ने ठाउँ हुनेछैन।उनीहरूले तिमीलाई जेलमा हाल्नेछन् र तिमीलाई आत्महत्या गर्नु बाहेक अर्को विकल्प रहनेछैन । यसो भन्दै गर्दा उनी निकै चर्को स्वरले कराउँदै थिए र म डरले काँपिरहेको थिएँ ।
नोभेम्बर २०२०ः कंगनाको बयान बाहिर आएपछि जावेद अख्तरले उनको विरुद्ध आईपीसीको धारा ४९९ (मानहानि) अन्तर्गत उजुरी दर्ता गरेका थिए ।
नोभेम्बर २०२०ः कंगनाले जावेद अख्तरको उजुरीपछि काउन्टर केस दायर गरिन्।
डिसेम्बर २०२०ः जावेद अख्तरले यस मुद्दामा आफ्नो बयान रेकर्ड गरे। बयानमा जावेदले कंगनाले बिना कुनै प्रमाण आफूमाथि झुटो आरोप लगाएको बताएका थिए ।
