काठमाडौँ । इंग्लिस प्रिमियर लिग फुटबलमा लिभरपुलले जित निकालेको छ ।
गएराति भएको खेलमा लिभरपुलले वल्भ्सलाई २–१ गोलले हराएको हो । घरेलु मैदान एनफिल्डमा लिभरपुललाई जित दिलाउन लुइस डियाज र मोहम्मद सलाहले गोल गरे । वल्भ्सका म्याथ्युस कुन्हाले एक गोल फर्काए ।
लिभरपुलले दुबै गोल पहिलो हाफमा गर्यो । १५ औं मिनेटमा डियाजले गोल गर्दै घरेलु टोलिलाई सुरुवाती अग्रता दिलाए । ३७ औं मिनेटमा मोहम्मद सलाहले पेनाल्टीमार्फत गोल गर्दै लिभरपुलको अग्रता दोब्बर पारे ।
खेलको ६७ औं मिनेटमा कुन्हाले गोल गर्दै वल्भ्सलाई १–२ को स्थितीमा ल्याए । पहिलो हाफ लिभरपुलले दबाबमा राख्दा दोस्रो हाफ भने वल्भ्सले लिभरपुललाई दबाबमा राख्यो । तर, वल्भ्सले गोल भने गर्न सकेन ।
यो नतिजासँगै शीर्षस्थानको लिभरपुलले दोस्रो स्थानको आर्सनलसँग अंकदुरी बढाएको छ । लिभरपुलको २५ खेलबाट ६० अंक छ भने आर्सनलको ५३ अंक छ । पराजित वल्भ्स १९ अंकका साथ १७ औं स्थानमा छ ।
