काठमाडौँ। चिनियाँ नयाँ वर्षको अवसरमा काठमाडौँमा भएको मैत्रीपूर्ण फुटबलमा नेपाली युवा टोली पराजित भएको छ।
शनिबार त्रिपुरेश्वरस्थित दशरथ रंगशालामा भएको खेलमा पाहुना टोलीले नेपाललाई २–० ले पराजित गरेको हो । खेलको पहिलो हाफमै युनान युवा टोलीले अग्रता लिएको थियो ।
पहिलो हाफको २० औँ मिनेटमा मेनगुई यो को गोलमा चिनियाँ टोलीले सुरुवाती अग्रता बनाएको थियो। त्यसपछि खेलको ७८ औं मिनेटमा विनहान वाङ को गोलमा चिनियाँ टोलीले २–० को अग्रता बनायो । त्यसपछि खेलमा थप गोल हुन नसक्दा नेपाली टोलीले हार व्यहोर्न बाध्य भयो ।
अखिल नेपाल फुटबल संघ (एन्फा) को आयोजना र नेपालस्थित चिनियाँ दूतावासको सहयोगमा मैत्रीपूर्ण फुटबल आयोजना भएको हो । गत वर्ष भएको खेलमा नेपाल ५-१ ले विजयी भएको थियो। खेलमा क्रममा चिनियाँ साँस्कृतिक झाँकी प्रदर्शन गरिएको थियो।
