काठमाडौं । ताप्लेजुङ्गको पाथीभरा मन्दिरसम्म पुग्ने केबलकार निर्माणमा विरोध जनाईरहेका आन्दोलनरत पक्ष र सरकारबीच आज पनि वार्ता हुँदै छ ।
सोमबार राति अबेरसम्म चलेको वार्ता निष्कर्षविहीन भएपछि आज दोस्रो दिन पनि वार्तामा बसेको हो ।
ललितपुरको हिमालय होटलमा बसेको पहिलो वार्तामा संघर्षरत पक्षले केबलकार निर्माण कार्य रोक्न माग गरेको थियो । पहिलो दिनको वार्ता निष्कर्षमा नपुगेपछि आज विहान ११ बजे बस्ने गरी बोलाईएको थियो ।
केबलकार निर्माणका विषयमा स्थानीयले उठाएका माग र विकास निर्माणको काम हुने गरी सरकारले गृह मन्त्रालयका सहसचिव प्रेमप्रसाद भट्टराईको नेतृत्वमा वार्ता समिति बनाएको थियो । सरकारले वार्ता टोलि बनाएसँगै आन्दोलनरत पक्षले पनि अमर तुम्याहाङको संयोजकत्वमा राम मादेन, शंकर लिम्बू र सरु सिंघक सदस्य रहेको ४ सदस्य सहजीकरण समिति भन्दै वार्ता टोलि बनाएको थियो ।
