काठमाडौँ । मलेसियामा जारी आइसिसी यु–१९ महिला टी–ट्वान्टी विश्वकप क्रिकेट प्रतियोगिताअन्तर्गत नेपालले दोस्रो खेल खेलिरहेको छ । नेपालले स्कटल्यान्डलाई ७४ रनको लक्ष्य दिएको छ ।
मलेसियाको युकेएम ओभल क्रिकेट मैदानमा जारी खेलमा टस जितेर पहिला ब्याटिङ गरेको नेपाल १८.५ ओभरमा ७३ रनमा अलआउट भयो ।
नेपालका लागि कप्तान पूजा महतोले सर्वाधिक २७ रन जोडिन् । यस्तै, सावित्रि धामीले १० रन बनाउँदा अन्य खेलाडीले दोहोरो अंकमा रन बनाउन सकेनन् । नेपालले अतिरिक्त १४ रन पायो ।
बलिङतर्फ स्कटल्यान्डकी मेइसी मकेइरा एक्लैले पाँच विकेट लिइन् । यस्तै, एम्मी बाल्डी र नयमा शेखले दुई–दुई विकेट लिए भने क्रिस्टी म्याककोलले एक–एक विकेट लिए ।
नेपाल र स्कटल्यान्डले हालसम्म एक–एक खेल खेलेका छन् । दुवै टोली आज पहिलो जितको खोजीमा छन् ।
यसअघि भएको पहिलो खेलमा नेपाल बङ्गलादेशसँग पाँच विकेटले पराजित भएको थियो । यस्तै स्कटल्यान्ड पहिलो खेलमा अस्ट्रेलियासँग नौ विकेटले पराजित भएको थियो ।
