काठमाडौँ । इंग्लिस प्रिमियर लिग फुटबल अन्तर्गत म्यान्चेस्टर सिटीले सहज जित निकालेको छ । गएराति भएको खेलमा सिटीले इप्सविच टाउनलाई उसकै घरेलु मैदानमा ६–० गोलले हराएको हो ।
सिटीलाई फराकिलो जित दिलाउन फिल फोडेनले दुई तथा कोभासिच, जेरेमी डोकु, एर्लिङ हालाण्ड र जेम्स म्याकाटीले एक–एक गोल गरे ।
जितसँगै सिटी २२ खेलबाट ३८ अंकका साथ तालिकाको चौंथो स्थानमा छ । इप्सविच १६ अंकका साथ १८ औं स्थानमा छ ।
यस्तै, गएराति नै भएको अर्को खेलमा म्यान्चेस्टर युनाइटेडले हार ब्यहोरेको छ । युनाइटेड घरेलु मैदानमै ब्राइटनसँग १–३ गोलले स्तब्ध बनेको हो ।
खेलको पाँचौं मिनेटमा यान्कुवा मिन्तेहले गोल गर्दै ब्राइटनलाई सुरुवाती अग्रता दिलाएका थिए । २३ औं मिनेटमा ब्रुनो फर्नान्डेजले पेनाल्टीमा गोल गर्दै युनाइटेडलाई १–१ गोलको बराबरीमा ल्याए । तर, दोस्रो हाफमा युनाइटेडले दुई गोल खायो ।
६० औं मिनेटमा काओरु मितोमा र ७६ औं मिनेटमा जर्जिनिओ रटरले गोल गर्दै ब्राइटनलाई जित दिलाए ।
यो नतिजापछि युनाइटेड २२ खेलबाट २६ अंकका साथ १३ औं स्थानमा छ भने ब्राइटन ३४ अंकका साथ नवौं स्थानमा छ ।
