काठमाडौँ । जय ट्रफी एलिट कपको उपाधिका लागि दुई विभागीय टीम नेपाल पुलिस र त्रिभुवन आर्मीबीच प्रतिस्पर्धा हुने भएको छ । यस्तै, बागमती र मधेश प्रदेश प्रतियोगिताबाट बाहिरिएका छन् ।
भर्खरै सकिएको खेलमा बागमतीलाई हराउँदै पुलिसले फाइनलमा स्थान बनाएको हो । प्रतियोगितामा दुई जित निकाल्ने एक्लो टीम पुलिस बन्यो । अर्कोतर्फ त्रिभुवन आर्मीले मधेश प्रदेशविरुद्ध स्पष्ट जित निकाल्दै फाइनलमा स्थान बनायो ।
बागमतीले दोस्रो इनिङमा पुलिसलाई ११६ रनको लक्ष्य दिएको थियो । पुलिसले ५ विकेट क्षतिमा लक्ष्य भेट्यो । पुलिसका अमित श्रेष्ठले लगातार अर्धशतक प्रहार गरे ।
पहिलो इनिङमा ७९ रनको उत्कृष्ट इनिङ खेलेका श्रेष्ठले दोस्रोमा ४४ बलमा ५६ रन बनाए । दोस्रो इनिङमा विष्फोटक सुरुवात गरेका कुशल भुर्तेलले १९ बलमा ३२ रन जोडेर आउट भए ।
फाइनल खेल माघ १ गतेदेखि ३ गतेसम्म चल्नेछ ।
