दुबईः इन्डियन प्रिमियर लिग अन्तर्गत बिहीबारको खेलमा सनराइजर्स हैदराबादले किंग्स इलेभेन पञ्जाबलाई ६९ रनको विशाल रन अन्तरले पराजित गरेको छ ।
टस जितेर पहिले ब्याटिङ रोजेको हैदराबादका लागि प्रारम्भिक जोडी जोनी बेयरस्टो र कप्तान डेभिड वार्नरले गरेको साझेदारीले महत्वपूर्ण भूमिका निर्वाह गरेको थियो । बेयरस्टोले ९९ रन बनाएका थिए भने वार्नरले ५२ रन बनाएका थिए ।
समग्रमा हैदराबादले ६ विकेटको क्षतिमा २०१ रन बनाएको थियो ।
विशाल लक्ष्य पछ्याउने क्रममा पञ्जाब १६.२ ओभरमा सबै विकेट गुमाएर १३२ रनमै समेटियो । पञ्जाबका लागि निकोलस पूरनले व्यक्तिगत ७७ रन बनाए । उनी रसिद खानको बलमा आउट भए ।
हैदराबादका तर्फबाट उत्कृष्ट फिल्डिङ, बलिङ र ब्याटिङ प्रदर्शन गरिएको थियो ।
यो जितसँगै हैदराबादको उत्कृष्ट चार टिम हुने आशा जीवितै रहेको छ । अंक तालिकामा छ खेलबाट ६ अंक सहित तेस्रो स्थानमा उक्लेको छ । पहिलो र दोस्रो स्थानमा क्रमशः मुम्बई इन्डियन्स र दिल्ली क्यापिटल्स रहेका छन् ।
निकै राम्रो ब्याटिङ गरेको र प्रतिभावान खेलाडी रहेको पञ्जाबले ६ खेलमध्ये ५ खेल हारेर अंक तालिकाको पुछारमा पुगेको छ ।
आज शुक्रबार दिल्ली क्यापिटल्स र राजस्थान रोयल्सबीच प्रतिस्पर्धा हुनेछ ।