एजेन्सी । विश्व प्रसिद्ध तबलावादक तथा पद्मविभूषण उस्ताद जाकिर हुसैनको निधन भएको छ ।
उनको परिवारले सोमबार बिहान यसको पुष्टि गरेको हो । परिवारका अनुसार हुसैन इडियोप्याथिक पल्मोनरी फाइब्रोसिसबाट पीडित थिए ।
परिवारका अनुसार उनी पछिल्लो दुई सातादेखि सान फ्रान्सिस्कोको अस्पतालमा भर्ना थिए । उनको अवस्था बिग्रिएपछि उनलाई आईसीयूमा भर्ना गरिएको थियो । उनले त्यहीँ अन्तिम सास फेरे ।
जाकिरको जन्म ९ मार्च १९५१ मा मुम्बईमा भएको थियो । उस्ताद जाकिर हुसेनलाई सन् १९८८ मा पद्मश्री, २००२ मा पद्मभूषण र २०२३ मा पद्मविभूषण सम्मानित गरिएको थियो ।
जाकिर हुसेनले तीनवटा ग्रामी अवार्ड पनि पाएका थिए । उनको बुबाको नाम उस्ताद अल्लाह राखा कुरैशी र आमाको नाम बीवी बेगम थियो । जाकिरका पिता अल्लाह राखा पनि तबला वादक थिए । जाकिर हुसैनले आफ्नो प्रारम्भिक शिक्षा मुम्बईको माहिमको सेन्ट माइकल स्कूलबाट गरेका थिए ।
जाकिरले ११ वर्षको उमेरमा अमेरिकामा आफ्नो पहिलो कन्सर्ट गरेका थिए । सन् १९७३ मा उनले आफ्नो पहिलो एल्बम ‘लिभिङ इन द मटेरियल वर्ल्ड’ सार्वजनिक गरे ।
जाकिरमा सानैदेखि धुन बजाउने प्रतिभा थियो । कुनै पनि समतल ठाउँ देखेपछि उनी औँलाले धुन बजाउन थाल्दथे । उनले भान्साकोठामा प्यान, भाँडो र थाली जे पाउँथे त्यसलाई बजाउन थाल्थे ।
सुरुका दिनहरूमा जाकिर रेलमा यात्रा गर्थे । पैसाको अभावमा उनी जनरल कोचमा चढ्ने गर्थे । सिट नभेटिएमा भुइँमा अखबार फैलाएर सुत्ने गर्थे । यस अवधिमा तबलालाई कसैको खुट्टा नछोस् भनेर उनी काखमा राखेर सुत्ने गर्थे ।
