काठमाडौं । गैरआवासीय नेपाली संघ (एनआरएनए) पोर्चुगलले पाकिस्तानको कराकोरम पर्वतशृङ्खलास्थित के–२ (८,६११ मिटर) क्षेत्रमा आएको विनाशकारी हिमपहिरोमा परी निधन भएका नेपाली पर्वतारोहीहरूप्रति गहिरो दुःख व्यक्त गर्दै भावपूर्ण श्रद्धाञ्जली अर्पण गरेको छ।
संघले सार्वजनिक गरेको शोक–श्रद्धाञ्जली सन्देशमा विश्वप्रसिद्ध पर्वतारोही निर्मल ‘निम्सदाइ’ पुर्जा, पुरबहादुर गुरुङ (युक्ता), निमा शेर्पा, किली पेम्बा शेर्पा (किलु), ग्यालु शेर्पा र नावाङ थिन्दु शेर्पाको असामयिक निधनको खबरले आफूहरू अत्यन्त मर्माहित, स्तब्ध र शोकाकुल भएको जनाएको छ।
सन्देशमा निर्मल ‘निम्सदाइ’ पुर्जालाई विश्वप्रसिद्ध नेपाली पर्वतारोही, पूर्व बेलायती गोर्खा सैनिक, विश्व कीर्तिमानी तथा इलाइट एक्जिभेसनका संस्थापकका रूपमा स्मरण गरिएको छ। उहाँको असाधारण उपलब्धि, अदम्य साहस, अटल सङ्कल्प र ‘असम्भवलाई सम्भव बनाउने’ जीवनदर्शनले नेपाललाई अन्तर्राष्ट्रिय मञ्चमा गौरवान्वित बनाउनुका साथै संसारभरका लाखौं मानिसलाई प्रेरणा दिएको उल्लेख गरिएको छ।
एनआरएनए पोर्चुगलले यो अपूरणीय क्षतिको घडीमा शोकसन्तप्त परिवार, आफन्त, साथीभाइ, सहकर्मी तथा विश्व पर्वतारोहण समुदायप्रति गहिरो समवेदना व्यक्त गर्दै दिवंगत आत्माहरूको चिरशान्तिको कामना गरेको छ।
साथै, उहाँहरूले राष्ट्रको गौरव र पहिचानलाई विश्वमञ्चमा स्थापित गर्न पुर्याएको योगदान सधैं अमूल्य रहने उल्लेख गरिएको छ।
