बेइजिङ । चीनले विश्वको सबैभन्दा ठूलो चार खुट्टा भएको ‘रोबोट याक’ बनाएको दाबी गरेको छ । यो रोबोट याकले १६० किलोग्रामसम्म तौल उठाउन र एक घण्टामा १० किलोमिटरसम्मको यात्रा गर्न सक्ने चिनियाँ सञ्चारमाध्यमले दाबी गरेका छन् ।
चीनको आधिकारिक सीसीटीभीको रिपोर्टअनुसार यो रोबोट विशेषगरी मानिसलाई काम गर्न गाह्रो हुने र जोखिम पनि धेरै हुने ठाउँका लागि डिजाइन गरिएको हो । सीसीटीभीले यो रोबोट विश्वकै सबैभन्दा ठूलो र भारी भएको दाबी गरेको छ । यो रोबोट वयस्क मानिसको तुलनामा करिब आधा अग्लो छ। ठूलो आकार भए पनि १६० किलोग्राम उचाल्न र १० किलोमिटर प्रतिघण्टाको गतिमा दौडन सक्ने चीनले दाबी गरेको छ ।
रिपोर्टअनुसार यो याकमा सेन्सरहरू छन् र यसले आफ्नो वरपरको क्षेत्र पहिचान गर्न सक्छ। यो रोबोटले पहाड चढ्न तथा खाल्डाखुल्डी र चुचुराहरू पार गर्न सक्छ। यो हिलो सडक, घाँसे मैदान, मरुभूमि र हिउँ क्षेत्रहरूमा पनि हिँड्न सक्छ।
यो रोबोट १२ मोड्युलहरू मिलाएर बनाइएको हो। यो घुम्न, हिँड्न र अगाडि पछाडि घुम्न सक्छ। यो रोबोटले पठार, पहाड, मरुभूमि र घना जङ्गलमा सामान्य सवारी साधन चलाउन नसक्ने ठाउँमा समेत सैनिकलाई विस्फोटक पदार्थ र खाना पुर्याउन सक्ने चीनले दाबी गरेको छ ।
रोबोटको सहायताले शत्रुको क्षेत्रमा युद्धको समयमा सजिलै निगरानी गर्न सकिने चीनले दाबी गरेको छ । यसका साथै जुन लक्षमा निशाना लगाइएको छ त्यसको निगरानी गर्न पनि सकिनेछ । मानव सैनिकहरूलाई यी ठाउँहरूमा जान गाह्रो छ। चिनियाँ सेनाका विज्ञहरूले निगरानी गर्न सजिलो नभएका क्षेत्रमा पनि यी रोबोट याकको सहायताले निगरानी गर्न सकिने बताएका छन् । आवश्यक परेमा यी रोबोटलाई हतियारले सुसज्जित गर्न सकिन्छ।
चीनले मेशिन कुकुर पनि बनाएको छ जसको नाम मेरिगोल्ड राखिएको छ । यो कुकुर वास्तविक कुकुरको आकारको छ र यसको वजन ३२ किलोग्राम छ। यसले ४० किलोग्राम सामान बोक्न सक्छ। एजेन्सी
