काठमाडौं । गत मंसिरमा भएको कांग्रेसको १४ औं महाधिवेशनमा खुल्ला मधेशी केन्द्रीय सदस्यतर्फ निर्वाचित हुने ५ जनामध्ये दोस्रो सर्वाधिक मत ल्याएर विजयी भएका केन्द्रीय सदस्य विनोद चौधरीको क्रियाशील सदस्यतासम्बन्धी उजुरी खारेज भएको छ ।
खुल्ला मधेशी केन्द्रीय सदस्यतर्फ छैटौं नम्बरमा रहेर पराजित उम्मेदवार डा. सुभाषचन्द्र यादवले दोस्रो सर्वाधिक मतसहित निर्वाचित केन्द्रीय सदस्य चौधरीको उम्मेदवारी नै विधानविपरीत रहेको भन्दै कांग्रेसको निर्वाचन समितिमा उजुरी दिएका थिए ।
कांग्रेसको केन्द्रीय निर्वाचन समितिले गत पुस ३० गते सो उजुरी उपर निर्णय गर्दै दाबी नपुग्ने ठहर गरेको हो ।
समितिले कांग्रेस विधान र निर्वाचन निर्देशिकाअनुसार क्रियाशील सदस्यताको निरन्तरताको अवधि प्रमाणित गर्ने वैधानिक अधिकार कांग्रेस केन्द्रीय कार्यालयका मुख्यसचिवलाई रहेको र मुख्यसचिवले २०७८ मंसिर २४ मै चौधरीको सदस्यताको अवधी र योग्यता पुग्ने प्रमाणित गरेको उल्लेख गरेको छ ।
