मेलबर्न । न्यु साउथ वेल्स, भिक्टोरिया, क्वीन्सल्याण्ड, साउथ अष्ट्रेलिया र एसिटीमा कोभिड–१९ बाट रेकर्ड ७७ जनाको मृत्यु भएको छ । दैनिक सङ्ख्याका हिसाबले यो अष्ट्रेलियाका लागि सबैभन्दा घातक दिन हो ।
एनएसडब्लुले भिक्टोरिया २२, क्वीन्सल्याण्डमा १६ र अन्यत्रमा ३६ को मृत्यु भएको बताएको छ । दक्षिण अष्ट्रेलियामा थप दुईको र एक महिलाको एसिटीमा मृत्यु भएको छ।
महामारीको समयमा अघिल्लो उच्च दैनिक घोषणा गरिएको मृत्युको सङ्ख्या सेप्टेम्बर २०२० मा थियो जतिबेला भिक्टोरियाले एक दिनमा ५९ जनाको मृत्यु भएको बताएको थियो । यद्यपि यसमा जुलाई र अगस्टमा मरेका ५० वृद्ध समावेश थिए।
पछिल्लो घोषणामा देशमा विगत सात दिनमा ३५९ जनाको मृत्यु भएको रिपोर्ट गरिएको छ । यो सङ्ख्या अष्ट्रेलियामा महामारीको समयमा कोभिड–१९ बाट भएको कुल मृत्युको झन्डै १३ प्रतिशत हो।
एनएसडब्लुले मङ्गलबार २९ हजार ८३० नयाँ केस थपिएको बताएको छ । तीमध्ये अधिकांश पीसीआर परीक्षणमार्फत देखिएका हुन् । अहिले अस्पतालमा दुई हजार ८५० छन् र तीमध्ये २०९ लाई आइसीयुमा राखिएको छ ।
