एजेन्सी । कंगना रनावतको विवादित फिल्म ‘इमर्जेन्सी’लामो समयदेखि रिलिजको प्रतिक्षामा थियो । संवेदनशील विषयका कारण फिल्म विवादमा परेको थियो । फिल्मलाई देशभर प्रतिबन्ध लगाउन माग गरेपछि धेरै मुद्दा दर्ता भएका छन् ।
यता, सेन्सर बोर्डले फिल्मलाई सर्टिफिकेट दिन अस्वीकार गरेको थियो । तर, अब फिल्मको नयाँ रिलिज मिति सार्वजनिक भएको छ । कंगनाले हालै आफ्नो आधिकारिक इन्स्टाग्रामबाट फिल्मको नयाँ रिलिज मिति घोषणा गरेकी छिन् ।
देशको सबैभन्दा शक्तिशाली महिलाको महाकाव्य गाथा र भारतको भाग्य परिवर्तन गर्ने क्षण ‘इमर्जेन्सी’ १७ जनवरी २०२५ मा थिएटरमा देखिनेछ ।
फिल्म इमर्जेन्सी जुन १४, २०२४ मा रिलिज हुने थियो । तर, लोकसभा चुनावका कारण स्थगित भएको थियो । फिल्म ६ सेप्टेम्बर २०२४ मा रिलिज हुने थियो, तर रिलिज हुनु केही दिनअघि सेन्सर बोर्डले फिल्मलाई सर्टिफिकेट दिन अस्वीकार गर्यो ।
फिल्ममा विवादास्पद दृश्य रहेकाले शान्तिमा खलल पुग्ने आरोप लागेको थियो ।
फिल्म ‘इमर्जेन्सी’ पूर्व प्रधानमन्त्री इन्दिरा गान्धी र भारतमा लागू गरिएको आपतकालमा आधारित छ । कंगनाले फिल्ममा इन्दिरा गान्धीको भूमिका निर्वाह गर्नुका साथै निर्देशन पनि गरेकी छिन् । फिल्ममा उनीसँगै अनुपम खेर, महिमा चौधरी, श्रेयस तलपदे लगायतका कलाकारको मुख्य भूमिका छ ।
