काठमाडौँ । नेपालमा पहिलो पटक आधिकारिक रूपमा भिडियो सामाजिक सञ्जाल प्लेटफर्म टिकटक दर्ता भएको छ।
टिकटकको कम्पनीले आवश्यक कागजात पेस गरेसँगै नेपालमा आधिकारिक रूपमा दर्ता भएको सञ्चार तथा सूचना प्रविधि मन्त्रालयका सहसचिव एवम् प्रवक्ता गजेन्द्रकुमार ठाकुरले जानकारी दिए ।
सामाजिक सञ्जालको प्रयोगलाई व्यवस्थित गर्ने निर्देशिका, २०८० को दफा ३ को उपदफा ६ बमोजिमको व्यवस्था अनुसार टिकटक मन्त्रालयमा दर्ता गरिएको मन्त्रालयले जनाएको छ ।
यसअघि अश्लीलता फैलाएको भन्दै २०८० कात्तिक २७ मा सरकारले नेपालमा टिकटक बन्द गरेको थियो। पछि आधिकारिक रूपमा दर्ता गरेर सञ्चालन गर्नको लागि सहमति जनाएपछि भदौ ६ गते टिकटकको प्रतिबन्ध फुकुवा गरिएको थियो ।
आधिकारिक रूपमा दर्ता भएसँगै सरकारले टिकटकबाट पनि राजस्व पनि संकलन गर्ने बाटो खुला भएको छ । अब सरकारले टिकटकमा आपत्तिजनक कन्टेन्ट केही आएमा तत्काल नै पत्राचार गरेर हटाउन निर्देशन दिन सक्नेछ ।
