काठमाडौं । राष्ट्रिय मानव अधिकार आयोगले काठमाडौँको बुद्धनगरस्थित कान्तिपुर इन्टरनेश्नल कलेजमा विद्यार्थीहरुबाट भएको विरोध प्रदर्शनमा प्रहरी हस्तक्षेप हुँदा १ जना विद्यार्थी घाइते भएको र ११ जनालाई नियन्त्रणमा लिइएको घटनाप्रति ध्यानाकर्षण गराएको छ ।
बुधबार विज्ञप्ती जारी गर्दै आयोगले घटनाका सम्बन्धमा आयोगको टोलीले अनुगमन गरेको र अनुगमनको क्रममा कोरोना सङ्क्रमणको दर तीव्र गतिमा फैलिरहेको अवस्थामा नागरिकको जीवनको रक्षा गर्नु राज्यको दायित्व भएको भन्दै ध्यानाकर्षण गराएको हो ।
‘तीव्ररुपमा फैलिरहेको कोरोना महामारीबाट नागरिकको स्वास्थ्यमा पर्नसक्ने जोखिमलाई मध्येनजर गर्दै स्वास्थ्यसम्बन्धी मापदण्डहरुको पूर्ण पालना गर्न, गराउन र परीक्षा सञ्चालनमा वैकल्पिक उपायहरु अपनाई नागरिकको स्वास्थ्य सम्बन्धी अधिकारमा संवेदनशील हुन आयोग नेपाल सरकार, विश्वविद्यालय तथा सम्बद्ध सबै निकायलाई आग्रह गर्दछ ।’ विज्ञप्तीमा भनिएको छ ।
यो पनिः परीक्षामा कोरोना संक्रमितलाई पनि सँगै राखेपछि कान्तिपुर कलेजमा तनाव
