काठमाडौं ।राष्ट्रिय निजी तथा आवासीय विद्यालय एसोसिएसन नेपाल (नेसनल प्याब्सन)की राष्ट्रिय अध्यक्ष गीता क्षेत्री राणासहित केन्द्रीय पदाधिकारीहरूको टोलीले मधेश विश्वविद्यालयका उपकुलपति प्रा. डा. दीपकबहादुर शाक्यसँग उच्च शिक्षा छात्रवृत्ति, शिक्षक क्षमता अभिवृद्धि तथा विद्यालय शिक्षाको गुणस्तर सुधारलगायत विषयमा छलफल गरेको छ ।
छलफलमा उच्च शिक्षा छात्रवृत्ति आवश्यकता–आधारित मात्र नभई योग्यताका आधारमा समेत प्रदान गर्नुपर्ने विषयमा जोड दिइएको थियो । योग्य विद्यार्थीलाई छात्रवृत्तिको अवसर विस्तार गर्न सके विद्यार्थी पलायन रोक्नसमेत सहयोग पुग्ने धारणा नेसनल प्याब्सनको नेतृत्वले राखेको थियो ।
यस्तै, कक्षा १ देखि ८ सम्म अध्यापनरत शिक्षकको क्षमता अभिवृद्धिका लागि आवश्यक तालिम सञ्चालन, आधुनिक शिक्षण पद्धतिको प्रयोग तथा अनुसन्धानमा आधारित शिक्षक तालिमका विषयमा पनि छलफल भएको थियो । विद्यालय शिक्षालाई प्रविधिसँग जोड्दै प्राविधिक तथा व्यावसायिक विषयलाई पाठ्यक्रममा समावेश गर्ने तथा विद्यालयको पाठ्यक्रम विकासमा विश्वविद्यालयसँग सहकार्य गर्ने विषयमा समेत विचार–विमर्श भएको जनाइएको छ ।
छलफलमा विद्यालय शिक्षा र उच्च शिक्षाबीच प्रभावकारी समन्वय कायम गरी विद्यार्थीको सिकाइ उपलब्धि, शिक्षकको व्यावसायिक दक्षता तथा समग्र शैक्षिक गुणस्तर अभिवृद्धि गर्न दीर्घकालीन सहकार्य आवश्यक रहेकोमा जोड दिइएको थियो ।
नेसनल प्याब्सन र मधेश विश्वविद्यालयबीच सम्झौता गरी शिक्षक तालिम, शैक्षिक अनुसन्धान, पाठ्यक्रम विकास, नवप्रवर्तन, प्राविधिक तथा व्यावसायिक शिक्षा र विद्यालय–विश्वविद्यालय साझेदारीका कार्यक्रमलाई संस्थागत रूपमा अघि बढाउने विषयमा पनि छलफल भएको छ ।
उपकुलपति शाक्यले शिक्षा क्षेत्रको सुधारका लागि मधेश विश्वविद्यालयले आवश्यक प्राज्ञिक तथा प्राविधिक सहयोग उपलब्ध गराउन तयार रहेको बताउँदै आगामी दिनमा सहकार्यलाई व्यवस्थित र संस्थागत रूपमा अघि बढाउने धारणा व्यक्त गर्नुभएको थियो।
