काठमाडौँ । इंग्लिस प्रिमियर लिग फुटबलमा चेल्सीले सानदार जित निकालेको छ । गएराति भएको खेलमा चेल्सीले ब्राइटनमाथि ४–२ गोलको जित निकालेको हो ।
घरेलु मैदान स्टामफोर्ड ब्रिजमा चेल्सीलाई जित दिलाउन सबै गोल कोल पाल्मेरले गरे । रोचक कुरा उनले सबै गोल पहिलो हाफमै गरेका थिए ।
खेलको २१ औं, २८ औं (पेनाल्टी), ३१ औं र ४१ औं मिनेटमा गोल गरेका थिए । यता, ७ औं मिनेटमा ब्राइटनका जर्जिनिओ रुटेरले र ३४ औं मिनेटमा कार्लोस बालेवाले गोल फर्काएपनि सान्त्वना गोल मात्रै भयो ।
जितसँगै चेल्सी ६ खेलबाट १३ अंकसहित चौंथो स्थानमा छ । ब्राइटन ९ अंकका साथ आठौं स्थानमा छ ।
यस्तै, गएराति नै भएको अर्को खेलमा लिभरपुलले वल्भ्सलाई २–१ गोलले पराजित गर्यो । लिभरपुललाई जित दिलाउन इब्राहिम कोनाटेले र मोहम्मद सलाहले गोल गरे । वल्भ्सका रायन अइत नोउरीले एक गोल फर्काए ।
जितसँगै लिभरपुल अंकतालिकाको शीर्षस्थानमा उक्लिएको छ । उसको ६ खेलबाट १५ अंक छ । वल्भ्स १ अंकका साथ तालिकाको पुछारमा छ ।
