काठमाडौँ । राष्ट्रिय प्रजातन्त्र पार्टीका वरिष्ठ उपाध्यक्ष रवीन्द्र मिश्रले उपप्रधान तथा सहरी विकास मन्त्री एवं नेपाली कांग्रेसका नेता प्रकाशमान सिंहलाई खुला चुनौति दिएका छन् ।
उपाध्यक्ष मिश्रले एक्लै–एक्लै चुनाव लडेको भए उपप्रधानमन्त्री सिंहलाई दुबै पटक आरामले हराइदिने प्रतिक्रिया समेत दिएका छन् ।
सामाजिक सञ्जालमा मिश्रले भनेका छन् – ‘एक्लै–एक्लै लडेको भए मैले तपाईँ (प्रकाशमान सिंह)लाई दुबै पटक आरामले हराइदिन्थेँ । तर के गर्ने सबै हतकन्डा अपनाएर, अर्काको बुइ चढेर जित्नुभयो । त्यो पनि बल्लबल्ल थोरैथोरै मार्जिनले ।’
‘तर चुनाव जितेर, उपप्रधानमन्त्री भएर के गर्नुहुन्छ ?तपाईँको भन्दा मेरो नाक १०० गुणा बढी ठाडो छ । याद गर्नुभा’छ ?’ उनले प्रशन गरेका छन् ।
यस्तै, मिश्रले अबको चुनावमा सिंहलाई हराउने दाबी गर्दै त्यसबेला देशको वास्तविक रूपान्तरणको शंखनाद हुने समेत प्रतिक्रिया दिएका छन् ।
उनले भनेका छन् ‘अब तेस्रो पटक, अनाथ बालबालिकाको ‘बाल मन्दिर’ नै ध्वस्त पार्ने आरोप लागेकी दिदीलाई बचाऊ गर्न ‘मुद्दा नै ढिसमिस गर्न खोज्ने’ तपाईँलाई नहराई त कहाँ छोडुँला र ! जुन दिन म तपाईँलाई हराउँछु नि, त्यस दिन बल्ल यो देशको वास्तविक रूपान्तरणको शंखनाद हुनेछ । यसलाई शाब्दिक होइन, प्रतिकात्मक रूपमा बुझ्नुहोला ।’
मिश्र र सिंह काठमाडौँ १ बाट चुनाव लडेका थिए । सिंहले पछिल्लो पटकको निर्वाचनमा मिश्रलाई १२९ मतले हराएका थिए । त्यसअघि पनि मिश्र सिंहसँगै पराजित हुन पुगेका थिए ।
