काठमाडौँ । नेपाल प्रहरी, महानगरीय अपराध महाशाखाले गुणस्तरहीन मह बिक्री गर्ने नतिजा प्याकेजिङका सञ्चालक ३८ वर्षीय नरेशबहादुर श्रेष्ठलाई पक्राउ गरेको छ ।
काठमाडौँ उपत्यकाका विभिन्न स्थानमा गुणस्तरहीन महको उत्पादन एवं बिक्री वितरण भइरहेको भन्ने गोप्य सूचनाका आधारमा यही माघ ६ गते महाशाखाको विशेष टोलीले मिसावट गरी गुणस्तरहीन मह बनाइरहेको अवस्थामा मह बनाउनका लागि प्रयोग गरिने विभिन्न प्रकारका सामाग्री, मेसिन, केमिकलहरु र गुणस्तरहीन तयारी तथा कच्चा मह समेत बरामद गरी निजलाई श्रेष्ठलाई पक्राउ गरिएको महाशाखाले जनाएको छ ।
महाशाखाले प्रारम्भिक अनुसन्धानपश्चात अनुसन्धान कारवाहीका लागि सिन्धुपाल्चोक इन्द्रावती–६ घर भई हाल ज्याठा बस्ने श्रेष्ठलाई महानगरीय प्रहरी परिसर टेकु पठाएको छ ।
विगत सात वर्ष अगाडिदेखि निजकी श्रीमती रस्मिला श्रेष्ठको नाममा नतिजा प्याकेजिङ सञ्चालन गरी गुणस्तरहीन मह बनाई बिक्री विततरण गर्दै आएको प्रारम्भिक अनुसन्धानबाट खुल्न आएको छ ।
महाशाखाले काठमाडौँ उपत्यकालगायत देशका विभिन्न भागमा नक्कली एवं गुणस्तरहीन मह बिक्री वितरण भइरहेको पाएएकाले त्यसतर्फ सजग एवं सचेत रहन आम नागरिक तथा उपभोक्तामा अपिल गरेको छ ।
