काठमाडौँ । प्रधानमन्त्री शेर बहादुर देउवासमक्ष राष्ट्रिय स्वास्थ्यकर्मी सङ्घ, नेपालले कोरोना महामारीमा खटिने स्वास्थ्यकर्मीहरुको १५ बुँदे माग पूरा गर्न ध्यानाकर्षण गराएको छ । स्वास्थ्य तथा जनसङ्ख्यामन्त्री विरोध खतिवडामार्फत स्वास्थ्यकर्मी सङ्घले शुक्रबार प्रधानमन्त्रीलाई ज्ञापनपत्र बुझाउँदै उक्त ध्यानाकर्षण गराएको हो ।
ज्ञापनपत्रमा सरकारी, निजी, सामुदायिक र अध्ययन संस्थानहरुमा कार्यरत सबै स्वास्थ्यकर्मी र कर्मचारीलाई नेपाल सरकारले तोकेको न्यूनतम पारिश्रमिक तुरुन्त उपलब्ध गराउन माग गरिएको छ । सेवा सुविधा उपलब्ध नगराउने संस्थालाई कारवाहीको माग पनि गरिएको छ ।
त्यस्तै सङ्क्रमित स्वास्थ्यकर्मीको निःशुल्क उपचारको व्यवस्था गराउनुपर्ने, सम्पूर्ण स्वास्थ्यकर्मी र अग्रस्थानमा खटिने कर्मचारीको यथाशीघ्र बीमाको व्यवस्था गराउनुपर्ने, करारमा नियुक्ति भई निरन्तर काम गरिरहेका सम्पूर्ण स्वास्थ्यकर्मीको म्याद थप गर्नुपर्ने, जनस्वास्थ्य मापदण्ड अपनाउने कार्यमा कडाइका साथ लागु गर्नुपर्ने लगायत माग राखिएका छन् ।
