काठमाडौं । सोमबार शेयर बजार २ दशमलव ३८ अंकले घटेको छ । शेयर बजार कारोबार सोमबार रू. ४ अर्ब ७८ करोड २७ लाख ४ हजार बराबरको शेयर कारोबार भएको छ । आइतबार करीब ७ अर्बको कारोबार भएको बजारमा सोमबार भने कारोबार रकममा पनि कमि आएको छ । सोमबार १९९ कम्पनीको ४६ हजार २४० पटकको व्यापारमा १ करोड २० लाख २१ हजार ३४७ कित्ता शेयर खरीदविक्री भएको छ ।
८ दिनसम्म लगातार बढेको बजार सोमबारबाट भने लगानीकर्ताहरुले नाफा बुक गरेका छन् । कम्पनीहरुले लाभांश प्रस्ताव गर्ने क्रम चलिरहेकाले यो समय बजार घट्ने वातावरण नभएको जानकारहरु बताउँछन् । बजार करेक्सन हुँदै अघि बढ्ने हुँदा संयमित भएर कारोबार गर्न जानकार लगानीकर्ताहरुले आग्रह गरेका छन् । आइतबार ४ दशमलव ६९ अंक बढेर १ हजार ७८२ दशमलव ८१ विन्दुमा बन्द भएको बजार सोमवार १ हजार ७८९ दशमलव ३६ विन्दुदेखि खुला भएको थियो । १ हजार ७९२ विन्दु पार गरेको सोमबारको बजार बन्द हुँदा १ हजार ७८० दशमलव ४३ विन्दुमा अडिएको छ । यो दिन ठूला कम्पनीहरुको कारोबार मापक सेन्सेटिभ इन्डेक्स पनि शून्य दशमलव १२ अंक घटेर ३४४ दशमलव ९५ विन्दुमा झरेको छ ।
यो दिन सर्वाधिक रकमको शेयर कारोबार गर्ने कम्पनीमा पहिलोमा नेपाल बैंक र दोस्रोमा नेपाल पुनर्बीमा कम्पनी रहेको छ । विगत लामो समयदेखि निरन्तर सर्वाधिक रकमको कारोबार गर्दै आएको नेपाल पुनर्बीमा कम्पनीलाई सोमबार भने नेपाल बैंकले उछिनेको छ । सोमबार नेपाल बैंकको रू.३० करोड २२ लाख ७ हजार र नेपाल पुनर्बीमा कम्पनीको रू. २९ करोड ३० लाख ३३ हजार बराबरको शेयर खरीदविक्री भएको हो । सर्वाधिक रकमको कारोबार भएको नेपाल बैंक लिमिटेडको शेयरमूल्य सोमवार प्रतिकित्ता रू. १३ ले बढेर अन्तिम मूल्य रू. ३६८ पुगेको छ । त्यस्तै, दोस्रो नम्बरमा सर्वाधिक रकमको कारोबार भएको नेपाल पुनर्बीमा कम्पनीको शेयरमूल्य भने सोमबार प्रतिकित्ता रू. ११ ले घटेर अन्तिम मूल्य रू. १ हजार १२७ कायम भएको छ ।सोमवार हाइड्रो इलेक्ट्रसिटी इन्भेष्टमेण्ट एण्ड डेभलपमेण्ट कम्पनी र हिमालयन डिष्टिलरी लिमिटेडको शेयरमूल्य ९ प्रतिशतभन्दा बढीले वृद्धि भएको छ ।
हाइड्रो इलेक्ट्रसिटी इन्भेष्टमेण्ट एण्ड डेभलपमेण्ट कम्पनीको ९ दशमलव ९२ प्रतिशत अर्थात प्रतिकित्ता रू. २५ ले बढेर रू. २७७ मूल्य कायम भएको छ भने हिमालयन डिष्टिलरीको ९ दशमलव ४५ प्रतिशत अर्थात प्रतिकित्ता रू. २६९ ले बढेर अन्तिम मूल्य रू. ३ हजार ११५ पुगेको छ । सोमबार बैंकिङ समूहको शून्य दशमलव ४५ प्रतिशत, व्यापारिक समूहको १ दशमलव ४१ प्रतिशत, होटल समूहको ३ दशमलव ७७ प्रतिशत र उत्पादन तथा प्रशोधन समूहको ३ दशमलव ५८ प्रतिशत परिसूचक बढेको छ । त्यस्तै यो दिन विकास बैंकको शून्य दशमलव शून्य ९ प्रतिशत, जलविद्युतको शून्य दशमलव १२ प्रतिशत, वित्तको शून्य दशमलव २ प्रतिशत, निर्जीवन बीमाको १ दशमलव ३४ प्रतिशत, अन्यको १ दशमलव १७ प्रतिशत, लघुवित्तको शून्य दशमलव ७६ प्रतिशत, जीवन बीमाको १ दशमलव ६८ प्रतिशत र म्यचुअल फण्ड समूहको १ दशमलव ४७ प्रतिशतले परिसूचक घटेको छ । सोमवार होटल समूहका लगानीकर्ताहरुले सर्वाधिक कमाएका छन् भने निर्जीवन बीमा समूहका लगानीकर्ताहरुले सर्वाधिक गुमाएका छन् ।
