काठमाडौँ । इंग्लिस प्रिमियर लिग फुटबल अन्तर्गत म्यान्चेस्टर युनाइटेडले सहज जित निकालेको छ ।
भर्खरै सम्पन्न खेलमा युनाइटेडले साउथह्याम्प्टनलाई उसकै घरेलु मैदानमा ३–० गोलले हराएको हो ।
युनाइटेडलाई जित दिलाउन म्याथिस डि लिग्ट, मार्कुस रासफोर्ड र अलेजान्ड्रो गर्नाचोले एक–एक गोल गरे ।
खेलको ३५ औं मिनेटमा डी लिग्टको गोलबाट युनाइटेडले सुरुवाती अग्रता बनाएको थियो । ४१ औं मिनेटमा रासफोर्डले गोल गर्दै युनाइटेडको अग्रता दोब्बर पारे । यस्तै, खेल सकिनै लाग्दा इन्जुरी समयमा गर्नाचोले गोल गर्दै एक गोल आफ्नो नाममा बनाए ।
७९ औं मिनेटमा कप्तान ज्याक स्टेफन्सले रातो कार्ड खाएपछि अन्तिमतिर साउथह्याम्प्टन १० खेलाडीमा समेटिएको थियो । जितसँगै युनाइटेडले ४ खेलबाट ६ अंक जोडेको छ । साउथह्याम्प्टनले भने खाता खोल्न सकेको छैन ।
