बंगलादेशकी प्रधानमन्त्री शेख हसिनाले पदबाट राजीनामा दिएर बिदेश पलायन भएलगत्तै बंगलादेशमा नयाँ सत्ता समिकरणको क्रम सुरू भएको छ ।

राष्ट्रपति मोहम्मद शाहबुद्दीनले लामो समयदेखि जेलमा रहेकी पूर्व प्रधानमन्त्री एवं विपक्षी नेतृ खालेदा जियालाइ जेलमुक्त गर्नु भएको छ ।

बेगम खालेदा जिया मुख्य विपक्षी दल बंगलादेश नेसन्लिस्ट पार्टी (बिएनपी) की अध्यक्ष हुन् । हाल ७८ वर्षकी जियाको स्वास्थ्य अवस्था नाजूक रहेको छ तर पूर्व प्रधानमन्त्री शेख हसिनाको सरकारले जिया विरुद्ध भ्रष्टाचारको आरोप लगाउँदै १७ वर्षको जेलसजाय दिएर थुनामा रहेकी थिइन् ।

राष्ट्रपति शाहबुद्दीनले डाकेको बैठकमा सेना प्रमुख वाकर–उज–जमान, बिएनपी र जमात ए इस्लामी पार्टी समेतका अन्य दलका शीर्ष नेताहरु उपस्थित थिए । उक्त बैठकमा प्रदर्शनका क्रममा जेलमा रहेका सबैलाई जेलमुक्त गर्ने सहमति भएको बंगलादेशी अखबार डेली स्टारले जनाएको छ ।

गत जुलाईदेखि बंगलादेशमा विद्यार्थीहरुले सरकार विरोधी अभियान थालेका थिए जसमा सयौं व्यक्तिको मृत्यु भएको छ ।

अन्तरिम सरकारको नेतृत्व युनुसलाई दिने तयारी

नोबेल पुरस्कार विजेता डा मोहम्मद युनुसलाई आगामी सरकारको मुख्य सल्लाहकार नियुक्त गर्न राष्ट्रपतिले आह्वान गर्न सक्ने बंगलादेशी अखबारहरुले जनाएका छन् । यसका लागि युनुसले आन्दोलनकारी विद्यार्थीहरुले राखेको प्रस्तावलाई स्वीकार गरेको बताइएको छ ।

आन्दोलनकारी विद्यार्थी नेता नाहिद इस्लामले आफूहरुले डा युनुससँग वार्ता गरेको र मुलुकको विद्यमान परिस्थितिलाई ध्यानमा राखी जतिसक्दो चाँडो डा युनुसको नेतृत्वमा सरकार गठन गर्न गरिएको प्रस्तावलाई उहाँले स्वीकार गर्नु भएको बताएका छन् ।

डा मोहम्मद युनुस

बंगलादेशमा प्रधानमन्त्री शेख हसिनाले राजीनामा गरेर देश छाडेपनि देशका विभिन्न भागमा लुटपाट, गोली चलाउने, दंगाफसाद, आगजनी र धार्मिक स्थलहरुमा आक्रमण गर्ने सिलसिला रोकिएको छैन ।

मुलुकको विग्रदो स्थितिलाई ध्यानमा राखी विद्यार्थी नेताहरु जतिसक्दो चाँडो अन्तरिम सरकार गठन गर्न तयार भएका छन् । उनीहरुले राष्ट्रपति शाहबुद्दीनलाई सरकार गठनमा बिलम्ब नगर्न आग्रह पनि गरेका छन् । उनीहरुले मन्त्रिपरिषदका सदस्यहरुको नाम पनि मंगलबार नै सार्वजनिक गरिसक्ने बताएका छन् ।

विद्यार्थी नेता नाहिदले अबको सरकार कुनै सेनाको नेतृत्वमा नहुने अथवा सेना समर्थित सरकार, पूर्ववर्ती सरकारमा काम गरिसकेका व्यक्तिको नेतृत्वमा सरकार गठन नहुने र त्यस्तो भएमा आफूहरुले अस्वीकार गर्ने बताएका छन् ।

नाहिदले सार्वजनिक सम्पत्ति र अल्पसंख्यकको सुरक्षाका लागि विद्यार्थीहरुले आजैदेखि खबरदारी गर्ने बताएका छन् ।