काठमाडौँ । सहकारी संस्था वचत रकम दुरुपयोग सम्बन्धमा संसदीय छानविन विशेष समितिको २२ औं बैठक बसेको छ ।
नेपाल चार्टर्ड एकाउन्टेन्ट संस्थाका अध्यक्ष प्रविणकुमार झालगायत प्रतिनिधिहरुसहित बसेको बैठकमा सहकारी क्षेत्रको लेखापरीक्षणको क्रममा देखिएका समस्या, वचत दुरुपयोग र ठगीको बारेमा लेखापरीक्षण र लेखापरीक्षकको महत्त्वपूर्ण भुमिकाका बारेमा कानुनी प्रबन्ध र गर्नुपर्ने सुधारको विषयमा व्यापक छलफल भएको समितिका सभापति सूर्य थापाले जानकारी दिनुभयो ।
साथै, वचत तथा ऋण सहकारी संस्थाहरूमा नियमन नगर्ने हो भने बन्द गर्नुहुने सुझावसमेत उहाँहरूबाट प्राप्त भएको सभापति थापाले बताउनुभयो ।
यस्तै, बैठकमा लेखापरीक्षकले कैफियत देखाएका विषयमा शेयर सदस्यहरूले ध्यान नदिने गरेको, बरू लाभांश, खानपान र यातायातलगायतमा ध्यान दिने स्थिति रहेको प्रवृत्ति पनि उल्लेख गरिएको छ ।
सभापति थापाका अनुसार सहकारीको चार्टर्ड एकाउन्टेन्टले लेखापरीक्षण गर्ने, हस्ताक्षरचाहिं रजिष्टर्ड लेखापरीक्षकले गर्ने, यसो गर्दा हस्ताक्षरकर्तालाई लेखापरीक्षणको अवस्था थाहा नहुने र लेखापरीक्षण गर्नेको प्रतिवेदना हस्ताक्षर नहुने बेथिति अन्त्य गर्न पनि जोड गरिएको छ ।
साथै, संचालक समितिको इच्छाअनुसारको लेखापरीक्षण प्रतिवेदन बनाउने गरी लेखापरीक्षक नियुक्त गरिने अवस्था हट्नु आवश्यक रहेको तथ्य समेत औँल्याइएको छ ।
