काठमाडौं । स्वास्थ्य उपचारका लागि बिदेश गएका माओवादी केन्द्रका नेता वर्षमान पुन आज (सोमबार) स्वदेश फर्कँदैछन् ।
पूर्वसभामुखसमेत रहेकी पत्नी ओनसरी घर्तीका साथ आज बेलुका चार्टर विमानमार्फत पुन नेपाल आउन लागेका हुन् ।
उनी उपचारका लागि गत असोजमा थाइल्यान्ड प्रस्थान गरी त्यतैबाट चीन पुगेका थिए ।
हाल उनको शरीरमा बिलुरुबिन (जण्डिस) को मात्रा नियन्त्रित अवस्थामा रहेको पारिवारिक स्रोतले बताएको छ ।
नेता पुनलाई चीनको थर्ड पिपुल्स हस्पिटल अफ सेनजेनले स्वास्थ्यमा सुधार भएसँगै डिस्चार्ज गरेको थियो ।
नेता पुन पार्टीको आठौं महाधिवेशनमा पनि आउन सकेका थिएनन् ।
नेता पुनकै आग्रहमा माओवादीको पदाधिकारी चयनको प्रक्रिया पनि स्थगित गरिएको थियो ।
