काठमाडौँ । भौतिक पूर्वाधार तथा यातायातमन्त्री रेणुकुमारी यादवले आफ्नो मन्तव्य व्यक्तिगतरुपमा कसैप्रति लक्षित नभएको बताउनुभएको छ । सो मन्तव्यलाई सामान्यरुपमा लिन आग्रह गर्दै आगामी दिनमा यसप्रति सचेत रहने उल्लेख गरेकी छन् । यही माघ ५ गते ‘बलिदानी दिवस’ का अवसरमा रौतहटस्थित गौरमा आयोजित श्रद्धाञ्जलि सभामा दिएको ‘विवादास्पद’ अभिव्यक्ति सम्बन्धमा उनले आज एक प्रेस विज्ञप्ति जारी गरी आफ्नो भनाइ स्पष्ट पारेकी हुन् ।
पार्टीको भ्रातृ सङ्गठन समाजावादी युवा संघले आयोजना गरेको सो समारोहमा मन्त्री यादवले जनमत पार्टीका अध्यक्ष सिके राउतलाई लक्षित गर्दै गौर हत्याकाण्ड दोहोरिन सक्ने धम्की दिएकी थिइन् । जनमत पार्टीका कार्यकर्ताले समारोहमा आफूलाई अवरोध गर्न खोजेपछि त्यस्तो आक्रोशपूर्ण अभिव्यक्ति दिएकी थिइन् ।
उनले आफूले दिएको अभिव्यक्ति कसैप्रति लक्षित, कुनै पूर्वाग्रह वा दूराशयपूर्ण मानसिकताबाट नभई आपसी मुठभेड नगर्न वा हुन नदिन, कुनै हिंसात्मक गतिविधि हुनबाट जोगाउन र शान्तिपूर्ण विधि प्रक्रियाबाटै राजनीतिक गतिविधि गर्ने अभिव्यक्ति दिएको बताएकी छन्। उनले विज्ञप्तिमा भनेकी छन्, “मेरो अभिव्यक्तिलाई लिएर केही भ्रम फैलिएको बुझिन आएकाले सोप्रति गहिरो दुःख व्यक्त गर्दै आफ्नो भनाइ कसैप्रति हिंसाको प्रयोग नगर्ने र कसैलाई उत्तेजित पार्न नभएको व्यहोरो जानकारीका लागि अनुरोध गर्दछु, साथै उक्त वक्तव्यलाई अतिरञ्जित नगरिदिनुहुन विनम्र आग्रह गर्दछु ।”
