![](https://newspolar.com/wp-content/uploads/2024/07/car-fire.jpg)
चितवन । चितवनमा रेलमार्ग सर्भे गर्न पुगेका प्राविधिकहरू सम्मिलित टोलीको गाडीमाथि आगजनी गरिएको छ ।
बुधबार दिउँसो भरतपुर महानगरपालिका–७ मा पुगेको आरएच कन्सल्टेन्सीको गाडीलाई स्थानीयले नियन्त्रणमा लिई प्रहरीकै अगाडि जलाइदिएका हुन् ।
भरतपुर महानगरपालिकाको दमकलले गाडीमा लागेको आगो निभाएको छ ।
टोलीले मंगलबार भरतपुर महानगरपालिका ८ मा सर्भे गरेको थियो । बुधबार वडा नं. ७ मा सर्भे गर्दागर्दै भेला भएका करिब २ सय स्थानीयले प्राविधिकहरूलाई नियन्त्रणमा लिएका थिए ।
पूर्व–पश्चिम रेलमार्ग भरतपुरका घना बस्ती भएका वडाबाट जाने गरी सर्भे गरिएको आरोप लगाउँदै उनीहरू चरणबद्ध आन्दोलमा छन् ।
बस्तीलाई उजाड बनाएर रेल मार्ग लैजान नदिने बताउँदै उनीहरूले अहिलेको सर्भे नै परिवर्तन गर्नुपर्ने माग गरेका छन् ।
चितवनमा रेलमार्गको प्रस्तावित रुट भरतपुर महानगरपालिका–४, ७ र ८ हुँदै नवलपरासीतर्फ लैजाने योजना छ ।