काठमाडौं । सोमबार नेप्से परिसूचक ३० दशमलव ३३ अंक उकालो लागेको छ । यस दिन शेयर बजार १ हजार ९६५ दशमलव ९६ विन्दुमा पुगेको हो ।
कारोबारमा आएका २०२ ओटा कम्पनीमध्ये १२३ ओटा कम्पनीको शेयर मूल्य बढेको छ भने ३८ ओटा कम्पनीको शेयर मूल्य घटेका छन् । त्यसैगरी १४ ओटा कम्पनीको शेयर मूल्य स्थिर रहेको छ। सोमबार २०२ ओटा कम्पनीको १ करोड २३ लाख ८२ हजार ४८२ कित्ता शेयर ६४ हजार ९३८ पटकमा रू. ६ अर्ब ६९ करोड ८८ लाख ७४ हजार ४८२ बरावरको शेयर खरीदविक्री भएको छ ।
नेपाल लाइफ इन्स्योरेन्सको सर्वाधिक कारोबार भएको छ । कम्पनीको रू. ७२ करोड ८८ लाख ६९ हजारभन्दा बढीको शेयर खरीदविक्री भएको हो । दोस्रोमा नेपाल पुनर्बीमा कम्पनीको रू. ५७ करोड ३९ लाखभन्दा बढीको शेयर खरीदविक्री भएको छ । आइतवार राजनीतिक अन्योलतका कारण बजार ९६ अंक घटेको थियो ।
कारोबारमा आएका १२ ओटा समूहमध्ये व्यापार समूहको परिसुचक १ दशमलव ९३ प्रतिशत, होटल समूहको परिसूचक १ दशमलव २ प्रतिशत र म्युचुअल फण्डको परिसूचक शून्य दशलमव १९ प्रतिशत घटेको छ भने बाँकी समूहको परिसूचक बढेको छ । सबैभन्दा बढी उत्पादन तथा प्रशोधन समूहको परिसूचक ३ दशमलव ०४ प्रतिशत वृद्धि भएको छ ।
यस दिन सबैभन्दा बढी एनआईसी एशिया बैंकको शेयर मूल्य ९ दशमलव ९० प्रतिशत वृद्धि भएको छ । उक्त कम्पनीको शेयर मूल्य प्रतिकित्ता रू. ७७७ पुगेको छ ।दोस्रोमा एनएमबि माइक्रोफाइनान्स वित्तीय संस्थाको शेयर मूल्य ६ दशमलव २२ प्रतिशत वृद्धि भएको हो । त्यसैगरी सोमबार सबैभन्दा बढी नारायणी डेभलपमेण्ट बैंकका शेयरधनीले धेरै गुमाएका छन् । बैंकको शेयर मूल्य ९ दशमलव ८७ प्रतिशतले घटेर रू. ४८४ मा झरेको छ । त्यसैगरी दोस्रोमा युनाइटेड इदी मर्दी कम्पनीको शेयर मूल्य ९ दशमलव ८५ प्रतिशतले घटेको छ ।
