![](https://newspolar.com/wp-content/uploads/2024/07/bishnu-poudel.jpeg)
काठमाडौं । नवनियुक्त उपप्रधानमन्त्री तथा अर्थमन्त्री विष्णुप्रसाद पौडेल पाँचौँ पटक यो जिम्मेवारीमा फर्किनुभएको छ । यसअघि उहाँ विसं २०७९ पुष ११ देखि फागुन १५ सम्म तथा २०७८ साल जेठ १ देखि २०७८ असार २९ सम्म उपप्रधान तथा अर्थमन्त्री बन्नुभएको थियो । त्यसैगरी विसं २०७७ र २०७२ सालमा पनि उहाँ अर्थमन्त्री बन्नुभएको थियो । पौडेल विसं २०६७ मा रक्षामन्त्री र विसं २०६५ मा जलस्रोत मन्त्री तथा विसं २०५३ मा युवा खेलकूद तथा संस्कृति मन्त्री बन्नुभएको थियो ।
पौडेल विसं २०७९ र विसं २०७४ को आमनिर्वाचनमा रुपन्देही क्षेत्र नं २ बाट प्रतिनिधिसभा सदस्यमा निर्वाचित हुनुभएको हो । त्यस्तै विसं २०५६ र विसं २०५१ को संसदीय निर्वाचनमा पनि प्रतिनिधिसभा सदस्यका रुपमा विजयी हुनुभएको थियो । त्यसैगरी विसं २०७० र विसं २०६४ को संविधान सभा सदस्य निर्वाचनमा उहाँ रुपन्देही जिल्लाको क्षेत्र नं ४ बाट संविधान सभा सदस्यमा निर्वाचित हुनुभएको थियो ।
वसं २०१६ मङ्सिर १५ मा स्याङ्जा जिल्ला, पुतलीबजार नगरपालिका वडा नं १० राङ्खोलामा जन्मिनुभएका पौडेल हाल ललितपुर महानगरपालिका वडा नं २५, सैँवु बस्नुहुन्छ । हाल नेकपा एमालेका उपाध्यक्ष पौडेल सो पदमा २०७८ मङ्सिर १०–१४ मा चितवनमा सम्पन्न दशौं राष्ट्रिय महाधिवेशनबाट निर्वाचित हुनुभएको हो । यसअघि उहाँ पार्टीको वैकल्पिक केन्द्रीय सदस्य, केन्द्रीय सदस्य, सचिव, उपमहासचिव, महासचिव हुँदै उपाध्यक्षमा निर्वाचित हुनुभएको हो । नेकपा (एमाले) र नेकपा (माओवादी केन्द्र)को एकीकरणपश्चात नेपाल कम्युनिष्ट पार्टी (नेकपा) को केन्द्रीय कमिटीद्वारा उहाँ महासचिवमा निर्वाचित हुनुभएको थियो ।
विसं २०३४ मा अखिल नेपाल कम्युनिष्ट क्रान्तिकारी कोअर्डिनेशन कमिटी (माक्र्सवादी– लेनिनवादी) सँग सम्पर्कमा आइ त्यसको इलाका पार्टी सक्रिय दलमा संगठित भएर आफ्नो राजनीतिक यात्रा सुरु गर्नुभएका पौडेलले २०३५ असोज ७ मा अखिल नेपाल कम्युनिष्ट क्रान्तिकारी कोअर्डिनेशन कमिटी (माक्र्सवादी¬–लेनिनवादी) को सदस्यता प्राप्त गर्नुभएको थियो ।
उहाँ २०३५ माघदेखि रुपन्देही जिल्ला अन्तर्गत नेपाल कम्युनिष्ट पार्टी (माले)को ईलाका कमिटी सदस्य भएर काम गर्नुभएको थियो । उहाँ २०४७ माघदेखि २०४९ माघसम्म नेपाल कम्युनिष्ट पार्टी (एमाले)को महाकाली अञ्चल इन्चार्ज र २०४९ देखि २०७३ सम्म विभिन्न समयमा करिब १० बर्ष लुम्बिनी अञ्चल इञ्चार्ज हुनुभयो ।
त्यसैगरी २०५१ माघदेखि विभिन्न समयमा नेपाल कम्युनिष्ट पार्टी (एमाले) केन्द्रीय संगठन विभागको सदस्य, सचिव र ६ कार्यकाल प्रमुख हुनुभयो । त्यस्तै २०५३ मा एमालेको उद्योग व्यवसाय विभागको प्रमुख, २०५५ असारमा स्थानीय निकाय विभागको प्रमुख र २०६६ असारमा संविधानसभा संसदीय विभागको प्रमुख भएर काम गनुभयो । त्यसपछि उहाँ २०५६ मा एमाले केन्द्रीय कार्यालय सचिव, २०६१ साउन र २०६९ असारदेखि केन्द्रीय सचिवालय सचिव र विभिन्न समयमा केन्द्रीय सचिवालय सदस्य रहेर काम गर्नुभयो । त्यसपछि २०७३ असोज ११ देखि एमाले प्रदेश नं ५ को संगठन कमिटीको संयोजक हुनुभयो ।
उहाँले राजतन्त्रको अन्त्य र लोकतान्त्रिक गणतन्त्र स्थापनाको आन्दोलन २०६२/६३ मा महत्वपूर्ण भूमिका निर्वाह गर्नुका साथै निरंकुश राजतन्त्र र पञ्चायती ब्यवस्था विरोधी संयुक्त जनआन्दोलन २०४६/४७ मा नेपाल कम्युनिष्ट पार्टी (माले)को तर्फबाट नवलपरासी जिल्लामा मुख्य नेतृत्वकर्ताको भूमिका निर्वाह गर्नुभयो । यसअघि उहाँ पटक पटक जेल जीवन भोग्नुभयो भने पार्टीका कामले भारतमा प्रवासनमा रहेर समेत काम गर्नुभएको थियो । रासस