काठमाडौँ । गौतमबुद्ध अन्तर्राष्ट्रिय विमानस्थलको उडान पुन: सुरू भएको छ । बिहीबार राति पौने १० बजे बुद्ध एयरको विमान अवतरण गर्ने क्रममा धावनमार्गमा चिप्लिएपछि विमानस्थलको अवतरण र उडान रोकिएको थियो ।
बिहीबारदेखि अवरूद्ध रहेको विमानस्थल शुक्रबार साढे १० बजेबाट सुचारु भएको छ । १०:३० बजेपछि विमानस्थलबाट बुद्ध एयरका दुई वटा र यती एयरको एउटा जहाज काडमाडौंका लागि उडेको विमानस्थलका अधिकृत विनोदसिंह रावतले जानकारी दिए ।
बिहिबार राति बुद्ध एयरको यु फोर ८०५ विमान धावनमार्गमा चिप्लिए धावनमार्गभन्दा ५ मिटर बाहिर घाँसे मैदानमा पुगेको थियो । विमानमा रहेका सबै यात्रु सकुशल अवतरण गरेको रावतले बताए ।
विमानको अगाडि पट्टिको बडीले भुइँमा छोएका कारण सुरक्षित निकाल्ने प्रयास भइरहेको र उक्त कार्यमा बुद्ध एयर, नेपाल वायुसेवा निगम र विमानस्थलका प्राविधिकहरूले प्रयास गरिरहेका अधिकृत रावतले जानकारी दिए ।
