काठमाडौं । राष्ट्रिय स्वतन्त्र पार्टीका महामन्त्री विपिनकुमार आचार्यले संसदको विद्यमान कार्यशैली र प्रभावकारितामाथि प्रश्न उठाउँदै सांसदहरूलाई आत्मसमीक्षा गर्न आग्रह गर्नुभएको छ ।
प्रतिनिधिसभाको शुक्रवारको बैठकमा सम्बोधन गर्दै उहाँले पछिल्लो संसदीय अभ्यास कर्मकाण्डी बन्दै गएको टिप्पणी गर्नुभयो । यही अवस्था कायम रहे नागरिकमा संसदप्रति निराशा बढ्ने उहाँको भनाइ थियो ।
कार्यपालिकालाई जवाफदेही बनाउने जिम्मेवारी बोकेको व्यवस्थापिका आफैँले आफ्नो लय समात्न नसकेको यथार्थ स्वीकार गर्नुपर्ने आचार्यले बताउनुभयो । उहाँले संसदीय बैठक समयमा सुरु नहुनु, गणपूरक संख्या नपुग्नु तथा सांसदहरू बैठकमा अनुपस्थित हुने अवस्थाले संसदको गरिमामाथि प्रश्न उठाएको बताउनुभयो ।
उहाँले पछिल्लो ६ महिनामा जनसरोकारका दुई हजार सात सयभन्दा बढी विषय संसदमा उठाइए पनि ती विषयको परिणाम के आयो भन्ने प्रश्न गर्नुभयो ।
‘विगत ६ महिनामा २७ सयभन्दा बढी पटक जनसरोकारका मुद्दा उठाइए पनि ती आवाजहरूको नतिजा के हो ? संसद बोल्ने मञ्च मात्र हो वा समाधान खोज्ने ?’ उहाँले भन्नुभयो ।
आचार्यले सांसदहरू एकअर्काका प्रतिस्पर्धी नभएको उल्लेख गर्दै देशका साझा समस्या समाधानका लागि सहकार्य आवश्यक रहेको बताउनुभयो । ‘हामी कोही पनि एकअर्काका प्रतिस्पर्धी होइनौँ । हाम्रो साझा प्रतिस्पर्धी गरिबी र कुशासन हो,’ उहाँले भन्नुभयो ।
उहाँले विधेयक निर्माणमा समेत सांसदहरूको भूमिकामाथि प्रश्न उठाउँदै संसदले कानुन निर्माणको आफ्नो मूल जिम्मेवारी प्रभावकारी रूपमा निर्वाह गर्नुपर्नेमा जोड दिनुभयो ।
