काठमाडौं । संघीय संसद् राष्ट्रिय सभाको २१औँ अधिवेशन १४५ दिनको कार्यावधिपछि शुक्रबार सम्पन्न भएको छ । गत वैशाख २८ गतेदेखि सुरु भएको अधिवेशन असोज १६ गते सम्पन्न भएको हो ।
अधिवेशन अवधिमा राष्ट्रिय सभाका ५२ वटा बैठक बसेका थिए । ती बैठकमा कुल ९८ घण्टा १० मिनेट संसदीय कामकारबाहीमा खर्च भएको थियो । अधिवेशनका क्रममा विभिन्न महत्वपूर्ण विधेयक पारित गर्नुका साथै समसामयिक राष्ट्रिय विषयमा सरकारको ध्यानाकर्षण गराउँदै निर्देशनात्मक भूमिका निर्वाह गरिएको थियो ।
सार्वजनिक खरिद, सम्पत्ति शुद्धीकरण तथा सहकारीलगायतका महत्वपूर्ण अध्यादेशलाई विधेयकका रूपमा पारित गर्दै सभाले कानुनी जटिलता समाधान गर्ने काम गरेको थियो । यस्तै, नीति तथा कार्यक्रम र बजेटमाथिको छलफलमा पनि राष्ट्रिय सभाले सक्रिय सहभागिता जनाएको थियो ।
अधिवेशनका क्रममा बजारमा देखिएको ग्यास अभाव तथा प्राकृतिक विपद्को जोखिम व्यवस्थापनलगायत नागरिक सरोकारका विषयमा सरकारको ध्यानाकर्षण गराइएको थियो । रसुवाको भोटेकोशी बाढीबाट प्रभावित नागरिकको उद्धार तथा राहतका लागि सरकारलाई विशेष निर्देशन दिइएको थियो भने बाढी तथा विपद् व्यवस्थापनका लागि संसदीय विशेष समितिसमेत गठन गरिएको थियो ।
त्यसैगरी, विभिन्न संवैधानिक निकायका वार्षिक प्रतिवेदनमाथि छलफल गरी कार्यान्वयनका लागि सम्बन्धित निकायलाई निर्देशन दिइएको थियो ।
अधिवेशनको समापनका क्रममा राष्ट्रिय सभा अध्यक्ष नारायणप्रसाद दाहालले सरकारले पर्याप्त विधेयक समयमै दर्ता गर्न नसक्दा कतिपय अवस्थामा आवश्यक ‘बिजनेस’को अभावमा बैठक प्रभावित हुनुपरेकोप्रति चिन्ता व्यक्त गर्नुभयो । उहाँले संसद्को प्रभावकारिता कायम राख्न आवश्यक विधेयक समयमै संसद्मा प्रस्तुत हुनुपर्नेमा जोड दिनुभयो।
