काठमाडौं । नेकपा (दाहाल नेपाल समूह) का तीन जना नेता आज पूर्व नेकपा एमालेको पार्टी अफिस मदन नगर पुगेका थिए । पार्टी लगभग औपचारिक रुपमै विभाजनको भोलिपल्ट आज उनीहरु सो पार्टी कार्यालय पुगेका थिए । त्यस क्रममा उनीहरुले मदन भण्डारीको शालिकमा माल्यार्पण गरेका थिए । ती तीन नेता थिए- पुष्पकमल दाहाल 'प्रचण्ड', माधव नेपाल र झलनाथ खनाल ।
नेताहरुको मुहार चमक त थिएन तर मदन भण्डारीले देखाएको बाटोमा आफूहरु सदैव हिँड्ने भने प्रण गरेका थिए । साथै उनीहरुले विसं २०७२ मा गएको भूकम्पबाट भत्किएको पार्टी कार्यालय भवन निर्माणका लागि पहल गर्ने बताएका थिए ।
यसैक्रममा मदन भण्डारीको शालिकको अघि उभिएका उनीहरुसँग मिडियाले प्रश्न गरेका थिए र प्रश्न केन्द्रित थिए संसद विघटन । पार्टीका अध्यक्ष तथा प्रधानमन्त्री केपी ओलीले संसदको विघटन गरेपछि उत्पन्न भएको परिस्थितिमा नै केन्द्रित थियो ।
यसो हेर्दा उनीहरु त्यहाँ 'सेन्टिमेट क्याच' गर्नका लािग पुगेको जस्तो देखिए पनि जनताको बुहदलीय जनवादप्रति उनीहरुको प्रतिबद्धता भने देखिन्थ्यो । यद्यपि, यीमध्ये कतिले जबज छोडेका हुन् भन्ने विषय यहाँ अहिलेको प्रसंग होइन । नेकपाको एकता गर्दा नै यो जबज छोडिएको भनिएकै हो । यसरी हेर्दा लाग्दथ्यो पार्टी एकताका बेला बिर्सिएका मदनलाई अहिले पार्टी फुटिसकेपछि सम्झिन खोजको देखिन्छ ।
यत्तिकैमा प्रेसबाट प्रश्न आयो प्रचण्डलाई- ओलीले संसद विघटन भयो तपाईको प्रतिक्रिया के छ ? उनको जवाफ आयो- ओलीबाट यस्तो निक्रिष्ट र गैरलोकतान्त्रिक चरित्र देखिएको छ, जुन सर्वथा अस्वाभाविक छ ।
अर्को प्रश्नमा हिजोमात्र सो समूहका अध्यक्ष प्रस्ताव गरिएका माधव नेपालको जवाफ थियो- ओलीबाट यति तल्लो स्तरको र निम्न कोटीको काम हामीले कहिल्यै कल्पना गरेनौँ ।
आफूमाथिको अर्को प्रश्नको जवाफमा अर्का वरिष्ठ नेता झलनाथ खनालले भने- ओली अझै कम्युनिष्ट बनेका रहेनछन् ।
