काठमाडौँ । टी–२० विश्वकपको सुपर ८ अन्तर्गत शनिबार भएको खेलमा बंगलादेशलाई ५० रनले हराउँदै भारतले सेमिफाइनल पुग्ने आशा थप बलियो बनाएको छ ।
यसअघि अफगानिस्तानलाई ४७ रनले पराजित गर्दै भारतले विजयी यात्रा सुरु गरेको थियो ।
टस जितेर ब्याटिङ गरेको भारतले बंगलादेशविरुद्ध २० ओभरमा पाँच विकेट गुमाएर १९६ रन बनाएको थियो । जवाफमा बंगलादेशले २० ओभरमा आठ विकेट गुमाएर १४६ रन मात्रै बनाउन सक्यो ।
सर भिभियन रिचर्ड्स स्टेडियममा भएको खेलमा जितसँगै भारतीय टोलीले समूह–१ को अंक तालिकामा पहिलो स्थान हासिल गरेको छ । दुई खेलमा लगातार दुई जितसँगै उसको खातामा चार अंक छ । यसबाहेक उसको नेट रन रेट ं२.४२५ भएको छ ।
यससँगै उसले आफ्नो अर्को खेल सोमबार अस्ट्रेलियासँग खेल्नुपर्नेछ । यो खेल जित्यो भने भारत सेमिफाइनलमा पुग्ने छ । योसँगै अस्ट्रेलिया दोस्रो स्थानमा झरेको छ ।
हाल उसको दुई अंक छ । पहिलो स्थानका लागि उसले आइतबार अफगानिस्तानसँगको खेलमा ठूलो अन्तरले जित्नुपर्नेछ । अफगानिस्तान र बंगलादेशको टोली क्रमशः तेस्रो र चौथो स्थानमा छन् । दुवै टोलीले पछिल्लो खेलमा हार बेहोरेका छन् ।
१९७ रनको लक्ष्य पछ्याएको बंगलादेशले लिटन दास र तान्जिद हसनबाट राम्रो सुरुवात गरेको थियो । यी दुईबीच पहिलो विकेटका लागि ३५ रनको साझेदारी भएको थियो । लिटन १० बलमा १३ रन बनाएर आउट भए । सोही क्रममा कुलदीप यादवले ६६ रनको स्कोरमा तान्जिदलाई एलबीडब्ल्यू आउट गरेका थिए ।
उनी २९ रन बनाएर प्याभिलियन फर्किए । यस खेलमा कप्तान नजमुल हसन शान्तो बाहेक बंगलादेशबाट कुनै ब्याट्सम्यानले राम्रो खेलेनन् । उनले ३२ बलको सामना गर्दै एक चौका र तीन छक्काको सहयोगमा ४० रन बनाए । तर, जसप्रित बुमराहले उनलाई अर्धशतक बनाउने क्रममा आफ्नो शिकार बनाए ।
बंगलादेशको ब्याटिङ अर्डर भारतीय बलरहरु विरुद्ध निरिह बन्यो । उक्त खेलमा तौहिदले चार रन, शकिब अल हसनले ११ रन, महमुदुल्लाहले १३ रन, जाकिर अलीले एक रन, रिशाद हुसेनले २४ रन बनाए । भने मेहदी हसन र तन्जिमले क्रमशः ५ र १ रन बनाएर अविजित रहे । भारतका लागि कुलदीप यादवले ३ विकेट लिए भने अर्शदीप सिंह र बुमराहले २–२ विकेट लिए । योसँगै हार्दिक पाण्ड्याले पनि एक विकेट लिए ।
त्यसअघि बंगलादेशले टस जितेर भारतलाई पहिले ब्याटिङको निम्तो दिएको थियो र टोलीले २० ओभरमा पाँच विकेट गुमाएर १९६ रन बनाउन सफल भयो । यो विश्वकपमा भारतको सबैभन्दा ठूलो स्कोर हो । भारतले यस प्रतियोगिताको इतिहासमा तेस्रो उच्च स्कोर बनाएको छ ।
यो नर्थ साउन्ड स्टेडियममा टी–२० मा टिमको सबैभन्दा ठूलो स्कोर पनि हो । टस हारेर पहिले ब्याटिङ गर्न आएको भारतीय टोलीको सुरुवात राम्रो भएपनि कप्तान रोहित शर्माले यो साझेदारीलाई अझ ठूलो बनाउन सकेनन् र शकिब अल हसनको बलमा उनी आउट भए ।
रोहितको विकेटसँगै शकिब टी–२० विश्वकपमा ५० विकेट पूरा गर्ने पहिलो बलर बनेका छन् । खराब फर्ममा रहेका विराट कोहलीको ब्याटले यो खेलमा रन बनायो । उनले २४ बलमा ३६ रनको इनिङ खेले ।
भारतका लागि हार्दिकपछि कोहली दोस्रो सर्वाधिक रन बनाउने खेलाडी बने तर अर्धशतक बनाउन सकेनन् । त्यसै क्रममा शिवम दुबेले हार्दिक पाण्ड्यालाई राम्रो सपोर्ट गर्दै २४ बलमा ३४ रनको इनिङ खेले । एक समय भारतीय टोलीले २०० रनको स्कोर पार गर्छ भन्ने लाग्थ्यो तर बंगलादेशका बलर केही हदसम्म पुनरागमन गर्न सफल भए ।
