काठमाडौँ । टी–२० विश्वकपको ३८ औँ खेलमा श्रीलंकाले नेदरल्यान्ड्सलाई ८३ रनले पराजित गरेको छ । सेन्ट लुसियाको ड्यारेन सामी क्रिकेट मैदानमा नेदरल्याण्ड्सले टस जितेर पहिले बलिङ गर्ने निर्णय गरेको थियो ।
टस हारेर ब्याटिङ गरेको श्रीलंकाले २० ओभरमा ६ विकेट गुमाएर २०१ रन बनाएर नेदरल्यान्ड्सलाई २०२ रनको लक्ष्य दिएको थियो ।
जवाफमा नेदरल्याण्ड १६.४ ओभरमा ११८ रनमा अलआउट भयो । श्रीलंका यस विश्वकपमा २०० रन बनाउने दोस्रो टोली बनेको छ । यसअघि १७औं खेलमा अस्ट्रेलियाले इंग्ल्याण्डविरुद्ध २०१ रन बनाएको थियो ।
यी दुई टोलीबाहेक अन्य कुनै टोलीले यो विश्वकपमा २०० रनको स्कोर छुन सकेका छैनन् ।
श्रीलंकाका लागि कुसल मेन्डिस र चरित असालान्काले ४६–४६ रनको इनिङ्स खेले । धनञ्जय डि सिल्भाले ३४ र एन्जेलो म्याथ्युजले अविजित ३० रन बनाए । अन्तिम इनिङ्समा कप्तान वानिन्दु हसरंगाले ६ बलमा अविजित २० रनको इनिङ खेले ।
नेदरल्याण्ड्सका लागि लोगान भान बेकले दुई विकेट लिए । टिम प्रिन्गल, भिभियन किङ्मा, पल भान मिकरेन र आर्यन दत्तले समान १–१ विकेट लिए ।
२०२ रनको लक्ष्य पछ्याएको नेदरल्यान्ड्सका ब्याट्सम्यानहरु ठूलो स्कोर बनाउन दबाबमा थिए । माइकल लेभिट र कप्तान स्कट एडवर्ड्सबाहेक अन्य कुनै ब्याट्सम्यानले ठूलो इनिङ खेल्न सकेनन् । यी दुवै ब्याट्सम्यानले ३१–३१ रन बनाए । सिब्रान्ड एङ्गेलब्रेचले ११, म्याक्स ओडाउडले ११ र आर्यन दत्तले १० रन बनाए ।
यी बाहेक अरु कुनै ब्याट्सम्यानले दोहोरो अंक छुन सकेनन् । श्रीलंकाका बलरल नुवान तुषाराले ३ विकेट लिए । भानिन्दु हसरंगा र मथिश पथिरानाले २–२ विकेट लिए । महिष टिक्षाना र दासुन शनाकाले १–१ विकेट लिए ।
यस समूह डी बाट दक्षिण अफ्रिका र बंगलादेश सुपर ८ मा प्रवेश गरेका छन् ।
