काठमाडौं । प्रधानमन्त्री पुष्पकमल दाहाल भारतका प्रधानमन्त्री नरेन्द्र मोदीको सपथ ग्रहण समारोहमा सहभागी हुन आज नयाँदिल्ली जाँदैछन् ।
प्रधानमन्त्रीको भ्रमण टोलीमा उनकी छोरी गंगा दाहाल, कानुन तथा संसदीय मामिला मन्त्री पदम गिरी र उच्चपदस्थ सरकारी अधिकारी रहने परराष्ट्र मन्त्रालयले जनाएको छ ।
प्रधानमन्त्री दाहाल आज राति नयाँ दिल्लीमै बस्ने कार्यक्रम छ । उनी भोलि फर्किने कार्यक्रम रहेको परराष्ट्र मन्त्रालयले जनाएको छ ।
मोदी एनडीए गठबन्धनको नेतृत्व गर्दै तेस्रो कार्यकालका लागि भारतको प्रधानमन्त्री बनेका छन् । उनले आज साँझ सवा ७ बजे सपथ लिँदैछन् । मोदीको सपथग्रहण कार्यक्रममा विदेशी पाहुनासहित ८ हजार बढीको सहभागिता रहने बताइएको छ ।
प्रधानमन्त्री दाहाल मोदीको सपथ समारोहमा सहभागी हुन भारत जाने भनिए पनि यो भ्रमणलाई उच्च महत्वका साथ हेरिएको छ । मोदी प्रधानमन्त्री बन्ने निश्चित नै नभई प्रधानमन्त्री दाहाल भारत जाने चर्चा चलिसकेको थियो ।
प्रधानमन्त्री दाहालले भारतसँगको सम्बन्ध मजबुद बनाउन चाहेका छन् । त्यति मात्र नभएर अब मोदी नै प्रधानमन्त्री भएपछि व्यक्तिगतसम्बन्ध पनि बलियो बनाउने चाहना दाहालको छ । मादीको गठबन्धनले बहुमत हासिल गरेलगत्तै दाहालले फोन गरेर मोदीलाई बधाई दिएका थिए ।
नेपालको राजनीतिमा भारतको प्रभाव पर्छ भन्ने भाष्यबाट प्रधानमन्त्री दाहाल मुक्त छैनन् । त्यही भएर उनी भारतीय पक्षसँग सम्बन्ध थप सुधार गर्न चाहिरहेका छन् ।
प्रधानमन्त्री दाहाल र भारतीय समकक्षी मोदीबीच आजै साँझ नयाँ दिल्लीमा भेटवार्ता हुने छ । भेटमा नेपाल र भारतबीच देखिएका विवाद समाधानका बारेमा छलफल हुने छ ।
