काठमाडौं । भारतको प्रधानमन्त्रीमा नरेन्द्र मोदी नियुक्त भएका छन् । राष्ट्रपति द्रौपदी मुर्मुले मोदीलाई औपचारिक रूपमा आज साँझ प्रधानमन्त्रीमा नियुक्त गरेकी हुन् । मोदी तेस्रो कार्यकालका लागि प्रधानमन्त्री बनेका हुन् ।
प्रधानमन्त्रीमा नियुक्त मोदीले आइतबार साँझ ऐतिहासिक तेस्रो कार्यकालका लागि सपथ लिने छन् । लोकसभा निर्वाचनमा भाजपाले एकल बहुमत नल्याएपछि मोदी नेसनल डेमोक्रेटिक अलायन्सको तर्फबाट प्रधानमन्त्री बनेका हुन् ।
प्रधानमन्त्री पद पक्का गरिसकेपछि आज मोदीले संसद्को सेन्ट्रल हलबाहिर सम्बोधन गर्र्दै आफ्ना लागि भावुक बल भएको बताए । उनले गठबन्धनका दलहरुलाई विश्वासमा लिन केन्द्रित हुने गरी सम्बोधन गरेका थिए ।
उनले सम्बोधनमा पूर्वप्रधानमन्त्री अटल बिहारी बाजपेयी, शिवसेना संस्थापक बाला साहेब ठाकरे, शिरोमणि अकाली दलका प्रकाश सिंह बादलसमेत सहयोगी दलका दिवंगत नेतालाई पनि सम्झिँदै उनीहरूले एनडीएलाई मूर्त रुप दिएको बताए ।
मोदीले सरकार गठनअघि नै सबैलाई साथमा लिएर हिँड्ने बचन दिए । उनले सरकार चलाउन बहुमत चाहिने बताउँदै तर देश चलाउन सर्वसम्मत जरूरी रहेको ब्याख्या गरेका थिए ।
यो गठबन्धनले ३० वर्षमा पाँच–पाँच वर्षका तीन अवधि सफलतापूर्वक पूरा गरेको भन्दै उनले अटल बिहारी वाजपेयीको सरकारको सम्झना गरेका थिए ।
सम्बोधनका क्रममा मोदीले सर्वधर्म सम्भावको कुरा निकाले । भने ‘हामी सर्वधर्म सद्भावप्रति समर्पित छौँ ।’
संसदीय दलको नेता चयनपछि मोदीले सम्बोधन गरेका हुन् । उनी प्रधानमन्त्रीमासमेत नियुक्त भइसकेका छन् । तर गठबन्धन दलमा राजनीतिक भागबन्डा भने मिल्न सकेको छैन । मन्त्रालयहरुको समेत टुंगो लाग्न बाँकी रहेको बताइएको छ ।
