काठमाडौँ । अमेरिकाले टी–२० विश्वकप २०२४ को पहिलो ठूलो उथलपुथल निम्त्याएको छ । उसले समूह ए को खेलमा २००९ को च्याम्पियन पाकिस्तानलाई सुपर ओभरमा पराजित गरेको हो । यो खेल टेक्सासको डलासस्थित ग्रान्ड प्राइरी स्टेडियममा भएको थियो ।
टस हारेर पहिले ब्याटिङ गरेको पाकिस्तानले २० ओभरमा सात विकेट गुमाएर १५९ रन बनाएको थियो । कप्तान बाबर आजमले सर्वाधिक ४४ रन बनाएका थिए । जवाफमा अमेरिकाको टोलीले पनि २० ओभरमा तीन विकेट गुमाएर १५९ रन बनाउन सक्यो । कप्तान मोनांक पटेलले सर्वाधिक ५० रन बनाए । यसपछि खेल सुपर ओभरमा पुगेको थियो ।
सुपर ओभरमा पहिले ब्याटिङ गरेको अमेरिकाले १८ रन बनाएको थियो । जवाफमा पाकिस्तानले ६ बलमा १३ रन मात्र बनाउन सक्यो ।
अमेरिकाको जितमा कप्तान मोनाङ्क पटेल र सौरभ नेत्रावलकरको महत्वपूर्ण योगदान थियो । अमेरिकाको चेजमा मोनाङ्कले ५० रनको इनिङ खेले । सोही क्रममा सौरभले सुपर ओभरमा उत्कृष्ट बलिङ गर्दै १९ रन बन्न दिएनन् । बायाँ हाते मध्यम गतिका बलर सौरभको जन्म सन् १९९१ मा मुम्बईमा भएको थियो ।
उनले २००८–२००९ कुचबिहार ट्रफीमा छ खेलमा ३० विकेट लिएका थिए । यसपछि उनी २०१० अन्डर–१९ विश्वकपका लागि भारतीय टोलीमा छनोट भए । विश्वकपअघि दक्षिण अफ्रिकामा भएको त्रिकोणीय शृङ्खलामा उनी सर्वाधिक विकेट लिने खेलाडी थिए ।
यसपछि, सौरभ न्यूजिल्याण्डमा भएको २०१० अन्डर–१९ विश्वकपमा केएल राहुल, जयदेव उनाडकट र मयंक अग्रवालसँग टीम इन्डियाको हिस्सा थिए । बाँकी तीन खेलाडीले सिनियर टीम इन्डियामा स्थान बनाए, तर सौरभ बाहिरिए ।
त्यसपछि उनले रणजी ट्रफी र विजय हजारे ट्रफी सहित अन्य भारतीय घरेलु प्रतियोगिताहरू पनि खेले । तर, केही राम्रो खोज्न उनी अमेरिका गए र त्यसयता अमेरिकाको प्रतिनिधित्व गर्दै आएका छन् । उनी अमेरिकी टोलीको कप्तान पनि भइसकेका छन् ।
यस्तै, मोनाङ्कको जन्म सन् १९९३ मा गुजरातको आनन्दमा भएको थियो । यी विकेटकिपर ब्याट्सम्यानले २०१८ मा अमेरिकाबाट खेल्न थालेका थिए र त्यसबेलादेखि नै त्यही टोलीबाट खेल्दै आएका छन् । उनले अन्डर–१६ र अन्डर–१८ क्रिकेटमा गुजरातको प्रतिनिधित्व गरेका छन् । मोनाङ्कले २०१० मा ग्रीन कार्ड पाए र २०१६ मा स्थायी रूपमा अमेरिका गएका थिए । उनी सन् २०१८ देखि अमेरिकाका लागि खेल्दै आएका छन् । सौरभ र मोनांकका अलावा हरमित सिंह पनि यो टोलीमा छन् । २०१२ मा, हरमितले उन्मुक्त चन्दको कप्तानीमा भारतका लागि अन्डर–१९ विश्वकप खेले र भारतलाई उपाधि जिताउन मद्दत गरे ।
२०२४ को टी–२० विश्वकपमा पाकिस्तानको यो पहिलो खेल थियो र त्यसैमा उसले आफूभन्दा निकै कमजोर रहेको अमेरिकासँग हार बेहोरेको छ ।
यो जितसँगै अमेरिकी टोली दुई जित र चार अंकसहित समूह ए को शीर्ष स्थानमा पुगेको छ । योसँगै भारत एक खेलपछि दुई अंक जोडेर दोस्रो स्थानमा छ ।
पाकिस्तानको अर्को खेल जुन ९ मा भारतसँग हुनेछ । यस्तै, अमेरिकाको टोलीले अब जुन १२ मा भारतको सामना गर्नेछ ।
