ललितपुर । नेपाली कांग्रेसका सभापति गगनकुमार थापाले जलवायु परिवर्तनको विषयलाई नेपालको विकासको मुख्य एजेण्डा बनाउनुपर्ने बताउनुभएको छ ।
बीपी कोइरालाको स्मृति दिवसका अवसरमा बुधबार ललितपुरमा आयोजित ‘जलवायु परिवर्तन र बीपीको विचार’ विषयक छलफल कार्यक्रममा बोल्दै सभापति थापाले जलवायु परिवर्तनको मुद्दालाई विकासको मूल प्रवाहमा जोड्नुपर्ने बताउनुभयो ।
उहाँले सामाजिक न्याय, मानव कल्याण, लोककल्याण, नैतिक जिम्मेवारी र दिगोपनाबिनाको विकास अर्थहीन हुने धारणा राख्नुभयो । विकासको अवधारणालाई केवल भौतिक पूर्वाधार निर्माणसँग मात्रै जोड्न नहुने भन्दै थापाले न्यायपूर्ण र दिगो विकासमा जोड दिनुपर्ने बताउनुभयो ।
सभापति थापाले बीपी कोइरालाले तत्कालीन समयमा ‘समावेशी’ शब्द प्रयोग नगरे पनि व्यवहारमै समावेशी लोकतन्त्रको अभ्यास गरेको स्मरण गर्नुभयो । महिलालाई मन्त्रिमण्डलमा सहभागी गराउने, दलित समुदायका प्रतिनिधिलाई पार्टीको महामन्त्री बनाउने तथा विभिन्न जातजाति र भाषाभाषीलाई संसद् र मन्त्रिमण्डलमा समेट्ने काम गरेर बीपीले समावेशी लोकतन्त्रको आधार प्रस्तुत गरेको उहाँको भनाइ थियो ।
थापाले बीपी कोइरालाले धेरै वर्षअघि नै वनको राष्ट्रियकरण तथा प्राकृतिक स्रोतसाधनमाथि न्यायपूर्ण पहुँचको विषय उठाएको उल्लेख गर्दै ती दूरदर्शी विचारलाई वर्तमान समयमा समेत आत्मसात गर्नुपर्ने बताउनुभयो ।
उहाँले नेपाली कांग्रेस भविष्यप्रति आशावादी रहेको बताउँदै भविष्यको मार्ग तय गर्न इतिहासबाट सिक्न आवश्यक रहेको उल्लेख गर्नुभयो । अग्रजहरूले देखाएको बाटो र उनीहरूका विचारलाई आधार बनाएर जलवायु परिवर्तनको विषयलाई नेपालको विकासको मूल विषय बनाउन कांग्रेस प्रतिबद्ध रहेको उहाँले स्पष्ट पार्नुभयो ।
‘आज हामीले जननायक बीपी कोइरालालाई जलवायु परिवर्तनसँग जोडेर सम्झिएका छौँ,’ उहाँले भन्नुभयो, ‘जलवायु परिवर्तन भन्ने शब्द बीपी कोइरालाले प्रयोग गर्नुभएको थियो वा थिएन, त्यो अलग कुरा हो । तर विकासका विषयमा सामाजिक न्याय, मानव कल्याण, नैतिक जिम्मेवारी र दिगोपनालाई बेवास्ता गरियो भने त्यस्तो विकासको कुनै अर्थ हुँदैन ।’
सभापति थापाले बीपीका अनुयायीहरूले पछिल्लो समय विकासको प्रतिस्पर्धामा लाग्दा उहाँले अघि सारेका कतिपय महत्वपूर्ण विषय बिर्सिएको बताउनुभयो । अब भने विगतका अनुभव र अग्रजका विचारबाट सिक्दै भविष्यतर्फ अघि बढ्नुपर्ने उहाँको भनाइ थियो ।
कार्यक्रममा युवा तथा विभिन्न क्षेत्रमा अनुभव हासिल गरेका विज्ञहरूसँग जलवायु परिवर्तन र विकासका विषयमा छलफल गरिएको थियो । छलफलबाट प्राप्त ज्ञान, सुझाव र अनुभवलाई पार्टीले नीतिगत तहमा उपयोग गर्दै लैजाने सभापति थापाले प्रतिबद्धता जनाउनुभयो ।
