काठमाडौं । गोर्खाको फुजेलका १७ वर्षीय बालक कृष्णसाद अधिकारीको निर्ममतापूर्वक हत्या गरिएको आज १९ वर्ष पूरा भएको छ ।
अधिकारीको २०६१ साल जेठ २४ गते हत्या भयो । चितवनको रत्ननगर बकुलहर चोकमा उनको गोली हानी हत्या गरिएको थियो । उनको हत्या भएको १९ वर्ष बितिसकेको छ । तर, हत्यारा को थिए ? अझै त्यो मुद्दा गर्भमै रहेको छ ।
यद्यपि, तत्कालीन चितवन माओवादी पार्टीको निर्देशनमा अधिकारीले सुराकी गरेको आरोपमा उनको हत्या गरिएको पार्टीले स्पष्टीकरण दिएको थियो । त्यतिखेर माओवादी युद्ध चरम उत्कर्षमा पुगेको थियो । उक्त हत्याकाण्ड माओवादी युद्धको एक विवादित हत्याकाण्ड भएको छ ।
हत्या भएका कृष्णप्रासाद अधिकारीका परिवारका तर्फबाट भने हत्या माओवादी पार्टीले नभई फुजेलकै छविलाल पौडेललगायतका मान्छेले कृष्णप्रसादको हत्या गरेको भन्दै उनीलगायत १३ जनाको नाममा किटानी जाहेरी दिएका थिए ।
त्यही आधारमा प्रहरीले अघि बढाएको मुद्दाका आरोपीहरु भने निर्दोष सावित भएका छन् । उच्च अदालत पाटन, हेटौंडा इजलासले अभियुक्तहरुलाई सफाइ दिने फैसला गरेको हो । यसअघि चितवन जिल्ला अदालतले पनि आरोपीहरु निर्दोष रहेको भन्दै सफाइ दिने निर्णय गरेको थियो ।
२०६१ जेठ २४ गते हत्या गरिएका छोरा कृष्ण अधिकारीका हत्यारालाई कारबाहीको माग गर्दै नन्दप्रसाद अधिकारीले अनशनको बाटो रोजेका थिए । उनले २०७० सालदेखि अनशन सुरु गरेका थिए । ३ सय ३२ दिन लामो अनशनपछि उनको वीर अस्पतालामा २०७१ असोज ६ गते निधन भएको थियो । अधिकारीको शवको अझै अन्त्येष्टि भएको छैन ।
दोषीलाई कारबाहीको माग गर्दै आमा गंगामाया अधिकारीले समेत अनशनकै बाटो रोजेकी थिइन् । अहिले पनि गंगामायाको सत्याग्रह जारी छ । तर न्याय पाएकी छैनन् । यो दिनलाई आजीजन सम्झी राख्न उनले हातमा टाटुसमेत खोपेकी छन् ।
