काठमाडौँ । टी–२० विश्वकपको नवौं संस्करण भोलि आइतबारदेखि वेस्ट इन्डिज र अमेरिकामा सुरु हुँदैछ, जसमा २० टोलीले एकअर्कासँग प्रतिस्पर्धा गर्नेछन् ।
२०२४ को टी–२० विश्वकपमा यी २० टोलीमा १० ठूला टोली छन् भने १० साना टोली छन् ।
पहिलो टी–२० विश्वकप १३ दिनसम्म खेलिएको थियो । यस प्रतियोगिताको पहिलो खेल ११ सेप्टेम्बर २००७ मा खेलिएको थियो। यो प्रतियोगिता दक्षिण अफ्रिकाका तीनवटा क्रिकेट स्टेडियममा खेलिएको थियो ।
पहिलो २२ हजार दर्शक क्षमता भएको केप टाउनको न्युल्यान्ड्स क्रिकेट मैदान, दोस्रो डरबनको किंग्समीड क्रिकेट स्टेडियम थियो जसमा २५ हजार दर्शक क्षमता थियो र तेस्रो जोहानेसबर्गको वान्डरर्स स्टेडियम थियो जसमा ३४ हजार दर्शक क्षमता थियो ।
१३ दिनसम्म चलेको पहिलो टी–२० विश्वकपमा १२ देशबीच खेल भएको थियो । यसमा टेस्ट म्याच खेल्ने १० ठूला टोलीहरू थिए । यस बाहेक दुई साना टिमले पनि यो पहिलो टी–२० विश्वकपमा आफ्नो स्थान बनाउन सफल भएका थिए । यस प्रतियोगितामा भारत, अष्ट्रेलिया, इंग्ल्याण्ड, न्यूजिल्याण्ड, दक्षिण अफ्रिका, पाकिस्तान, वेस्ट इन्डिज, श्रीलंका, बंगलादेश र जिम्बाब्वेका साथै केन्या र स्कटल्याण्डजस्ता नयाँ उदीयमान टोलीहरू समावेश थिए ।
टी–२० विश्वकप २००७ को फाइनल खेल २४ सेप्टेम्बर २००७ मा भारत र पाकिस्तान बीच खेलिएको थियो । यो जोहानेसबर्गको वान्डरर्स स्टेडियममा खेलिएको थियो । यस फाइनल खेलमा भारतले टस जितेर पहिले ब्याटिङ गर्ने निर्णय गरेको थियो । टस जितेर ब्याटिङ गरेको भारतले २० ओभरमा ५ विकेट गुमाएर १५७ रन बनाएको थियो ।
जवाफमा पाकिस्तान १९.३ ओभरमा १५२ रन बनाएर अलआउट भयो । भारतले पहिलो टी–२० विश्वकप ५ रनले जितेको थियो ।
