काठमाडौं । संसद्को अहिलेकै कार्यकालमा एक पटक जसरी पनि प्रधानमन्त्री बन्ने ध्याउन्नमा रहेका सत्तारुढ दल नेकपा एकीकृत समाजवादीका अध्यक्ष माधवकुमार नेपालको बेचैनी बढेको छ । नेपाली कांग्रेसका सभापति शेरबहादुर देउवाले कार्डका रुपमा प्रयोग गर्न खोजेपछि उनको छटपटी बढेको हो ।
आफ्नो दल सरकारमा भए पनि अध्यक्ष नेपाल विपक्षी दलको वैकल्पिक गठबन्धन बनाउने बैठकमा बिहीबार सहभागी भए । यता सत्ता समीकरणमा, उता विपक्षी खेमाको बैठकमा सहभागी हुनुले नेपाल ठूलै छटपटीमा रहेको पुष्टि हुन्छ ।
अध्यक्ष नेपालले सत्ता गठबन्धनका नेताहरुसँग धेरै पटक गुनासो गरिसकेका छन् । तर सुनुवाई हुनु त कता हो कता उल्टै उनी दबाबमा परिरहेका छन् । गठबन्धनका शीर्ष नेताहरुको बैठकमा उनलाई बोलाइएको छैन भने कुरासमेत सुनिँदैन । उनको पार्टी नेकपा एसले नेतृत्व गरेको सुदूरपश्चिम सरकारलाई पूर्णता दिन एमालेले सघाएको छैन । कर्णाली र कोशीमा एमालेको नेतृत्वमा आफ्नो दललाई सहभागी नगराएको, राजनीतिक नियुक्तिमा बेवास्ता गरेको, सरकारका महत्वपूर्ण निर्णय लिँदा आफूसँग परामर्श नगरेको लगायत उनका गुनासा हुने गरेका छन् ।
कांग्रेस–माओवादी गठबन्धन हुँदा नेपालको चुरिफुरी बेग्लै थियो । उनी सत्ताको मियो जसरी आफूलाई प्रस्तुत गर्थे । तर अहिले उनको कुरा सुन्नै छाडिएको छ । प्राय: आफ्ना गुनासो सम्बोधन नभएपछि नेपालको छटपटी सुरु हुन्छ । त्यसपछि उनी सार्वजनिक रूपमा दाहाल र एमाले अध्यक्ष केपी शर्मा ओलीको आलोचना गर्न थाल्छन् । विपक्षीहरुसँग नजिक हुन खोज्छन् ।
सत्ता समीकरणको रेखा नाघेर बुधबार उनी विपक्षी दल कांग्रेस, जनता समाजवादी नेपाल र लोकतान्त्रिक समाजवादीको बैठकमा सहभागी हुन कांग्रेस सभापति शेरबहादुर देउवा निवास बूढानीलकण्ठ पुगे । मधेश प्रदेशमा जसपाका मुख्यमन्त्री सरोजकुमार यादवले विश्वासको मत लिने सन्दर्भमा बोलाइएको बैठकमा नेपाल सहभागी भएर ओली र दाहाललाई अर्को विकल्पको पक्षमा रहेको संकेत गरे ।
मधेश सरकारबाट एमाले र माओवादी बाहिरिए पनि एस सरकारमै छ । ओली र दाहालले एसले मधेश सरकारमै रहेर यो समीकरणको विकल्प खुला राखेको अर्थका रूपमा लिएका छन् । तर बुधबार विपक्षी खेमाको बैठकमा सहभागी भएर नेपालले देखिने गरी सत्ता समीकरणलाई चुनौती दिएका छन् । प्रमुख प्रतिपक्ष कांग्रेसलगायत दलको समीकरण भत्काउने नीतिलाई बल पुग्ने गरी नेपालले गतिविधि गरेकोमा ओली र दाहाल भने असन्तुष्ट देखिएका छन् । उनीहरुको चाहना गठबन्धनमा बसेर अन्तरघात गर्नुभन्दा बाहिर गइदिए हुन्थ्यो भन्ने सम्मको भइसकेको छ ।
अहिले नेकपा एसका दुई जना मन्त्री सरकारमा छन् । प्रतिनिधिसभामा १० र राष्ट्रिय सभामा ८ जना सांसद रहेको नेकपा एसलाई तत्काल सरकारबाट बाहिर ल्याउन पनि नेपाल सक्दैनन् । किनकी पार्टी कमजोर छ र त्यसमा पनि विभाजनको डर छ । नेपाल बुधबार देउवा निवास बालुवाटार गएको भोलिपल्ट बिहीबार बिहान एसका वरिष्ठ नेता झलनाथ खनाल प्रधानमन्त्री दाहाललाई भेट्न बालुवाटार पुगे । उनले एस यही समीकरण बलियो बनाउने पक्षमा रहेकाले कुनै आशंका नगर्न आग्रह गरे ।
नेपाल असन्तुष्ट हुनुमा ओलीसँगको तिक्तता पनि एक कारण हो । एमाले विभाजन भएपछि सुरु भएको तिक्तता गत फागुनमा एउटै समीकरण र सरकारमा रहँदासमेत मेटिएको छैन । नयाँ समीकरण बनेपछि नेपाल निवासमै गएर ओलीले सम्मानजनक सहकार्य हुने बताए पनि त्यसपछि भने नेपाललाई व्यंग्य गर्दै आएका छन् । ओलीले एसलाई विभाजन गरी एमालेमा गाभ्न लागेको बुझाइ नेपालको छ ।
दोहोरो चेपुवामा परेका नेपाल अब यता त उताको भएका छन् । उनी न गठबन्धनबाट अलग हुन चाहन्छन् न सक्छन् नै । यस्तै दोधार कतिसम्म पालेर राख्ने ?
