ललितपुर । पशुपतिक्षेत्र परिसरमा आगामी साउन महिनाभर कोटिहोम महायज्ञ सञ्चालन गर्न लागिएको छ ।
नेपालको इतिहासमा सम्पन्न भएका यस्ता महायज्ञहरुमध्येकै ठूलो मानिएको यस कोटिहोम महायज्ञलाई सफल बनाउन अहिले विभिन्न क्षेत्रबाट काम भइरहेको छ । यसै अन्तर्गत आयोजक समितिले उपत्यका भित्र १३ सय भन्दा बढी कोटीहोम महायज्ञ उपसमितिहरु बनाइ सकिएको जनाएको छ ।
पशुपतिक्षेत्रमा आयोजना हुन लागेको नेपालकै हालसम्मको ठूलो पशुपति कोटीहोम एंव १०८ श्रीमद्भागवतको अहिले देश(विदेशमा चर्चा भैरहेको छ । कोटीहोम सफल बनाउन आयोजक समिति तीब्र गतिमा लागि परेको छ ।
महायज्ञ सञ्चालन र सफल बनाउनका लागि आयोजक समितिले उपत्यका भित्रका काठमाडौँ, भक्तपुर र ललितपुर जिल्लामा मात्र हालसम्म एक हजार ३३० ओटा उपसमिति बनाएको आयोजक संस्था मानव सेवा फाउण्डेसनका व्यवस्थापक विष्णुराज गिरीले जानकारी दिनुभएको छ ।
गिरीका अनुसार, अहिले उपसमितिले मनोनयनका साथै विभिन्न क्षेत्रका व्यक्ति तथा संस्थाहरुलाई निमन्त्रणा दिने कार्य भइरहेको छ । काठमाडौँ उपत्यकाका स्थानिय तह, धार्मिक मठमन्दिर, टोल सुधार समितिमा आबद्ध भएका धार्मिक मनहरुलाई समेटेर उपसमिति निर्माण गरेका छन् ।
मानव सेवा फाउण्डेसन अन्तर्गत सञ्चालमा रहेका मामाघर आश्रम र छोरीको घर ज्येष्ठ नागरिक आश्रमको भवन निर्माण एवं गाँस, बास, कपासका लागि सहयोगार्थ उक्त कोटीहोम महायज्ञ सञ्चालन हुन गैरहेको हो ।
महायज्ञमा कोटीहोमका नियममित कर्म, यज्ञ अनुष्ठान सँगै श्रीमदभागवत कथा प्रवचन, शिव महापुराण, रामायण आदि पाठ हुने छन् ।
कथाप्रवचनका लागि वाचन प्रविण पण्डित दीनबन्धु पोखरेल, सु–प्रसिद्ध कथा वाचिका राधिका दासी माता, देवी प्रतिभा, राम कथावाचिका चन्द्रकला सखी र श्रीमद देवी भागवत वाचिका विदुषी डा कान्ता भट्टराइको पनि सहभागिता रहने छ ।
