काठमाडौं । चितवनको मुग्लिननजिकै चार वटा सवारी साधन एकापसमा ठोक्किएर भएको दुर्घटनामा एक जनाको मृत्यु भएको छ । दुर्घटनामा २२ जना घाइते भएका छन् ।
मुग्लिन–नारायणगढ सडकखण्डको १७ किलोमा गएराति चारवटा गाडी ठोक्किएका हुन् । गएराति करिब साढे १२ बजेतिर भएको दुर्घटनापछि केहीबेर सडक अवरुद्ध भएको थियो ।
काठमाडौंबाट प्युठान जाँदा गरेको बा ४ ख ९०८६ नम्बरको बस, ना ३ ख ७९१५ नम्बरको ट्रक, काठमाडौंबाट महोत्तरी बर्दिवासको लागि जाँदै गरेको ना ७ ख ३२४८ नम्बरको बस र बीरगञ्जबाट काठमाडौं आउँदै गरेको ना ६ ख ८९६८ नम्बरको बस आपसमा ठोक्किएका हुन् ।
दुर्घटनाका घाइतेहरुको नयाँ मेडिकल कलेज भरतपुर र इच्छाकामना आधारभूत अस्पताल कुरिनटारमा उपचार भइरहेको छ । अहिले यो सडकखण्ड खुलिसकेको मुग्लिन प्रहरीले जनाएको छ ।
