बाँके । गर्मी अत्यधिक बढेपछि नेपालगञ्ज उपमहानगरपालिकाले विद्यालयहरुमा गर्मी बिदा दिएको छ । नेपालगन्जको तापक्रम अहिले ४२ डिग्री सेल्सियस नाघेको छ ।
अत्यधिक गर्मी र ‘लू’ का कारण पठनपाठनमा समस्या भएपछि तीन दिनका लागि पालिकाअन्तर्गतका सम्पूर्ण विद्यालयमा बिदा दिइएको शिक्षा, युवा तथा खेलकुद महाशाखाका उपसचिव गोर्खबहादुर थापाले बताए ।
महाशाखाले विपद् व्यवस्थापन समितिको निर्णयअनुसार बिदा दिएको हो । अब १५ गतेदेखि १८ गतेसम्म सम्पूर्ण बिद्यालयमा पठाइने हुने छैन । १९ गते पनि शनिबार परेकाले पठाइने हुने छैन ।
गर्मीका कारण नेपालगन्जको सम्पूर्ण जनजीवन कष्टकर भएको छ । तातो हावा चल्दा दिउँसो बजार क्षेत्र सुनसान जस्तै छ । बिहान र बेलुका मात्र बजारमा चहलपहल देखिने गरेको छ ।
