काठमाडौँ । एक महिनाभन्दा बढी लामो समयसम्म चलेको विश्वकै प्रतिष्ठित टी–२० लिग इन्डियन प्रिमियर लिग (आईपीएल) सकिएको छ । २२ मार्चदेखि सुरु भएको आईपीएल २६ मे (आइतबार) समापन भएको छ ।
१७ औं संस्करण रहेको यस सिजनको फाइनल खेल उत्साहजनक हुन सकेन । फाइनल खेल चेन्नईको चेपौकमा सनराइजर्स हैदरावाद र कोलकाता नाइट राइडर्सबीच भएको थियो ।
हैदरावादलाई ८ विकेटले पराजित गर्दै कोलकाता च्याम्पियन बन्यो ।
कोलकाताको यो समग्रमा तेस्रो उपाधि हो । टोलीले १० वर्षपछि उपाधि जितेको हो । पछिल्लो पटक कोलकाता सन् २०१४ मा च्याम्पियन बनेको थियो ।
टस जितेर ब्याटिङ रोजेको हैदरावाद १८.३ ओभरमा ११३ रनमा अलआउट भयो । यो आईपीएल फाइनलको सबैभन्दा कम स्कोर हो ।
कोलकाताले १०.३ ओभरमै २ विकेटको क्षतिमा लक्ष्य पूरा गर्यो । यो आईपीएल फाइनलको सबैभन्दा छिटो रन चेज हो ।
टी–२० इतिहासमै सर्वाधिक रन खडा गरेको हैदरावादको ब्याटिङ फाइनलमा भने निकै कमजोर रह्यो । हैदरावादले यसै सिजन ३ पटक २८७/३ (टी–२० मा सर्वाधिक स्कोर), २७७/३ र २६६/७ रन बनाएको थियो । तसर्थ फाइनलमा टोलीबाट यसप्रकारको स्कोरको अपेक्षा गरिएको थिएन ।
यता, कोलकाताको भने आफ्नो १० वर्ष लामो उपाधि खडेरीको अन्त्य गर्यो । यसअघि कोलकाताले २०१२ र २०१४ मा उपाधि जितेको थियो ।
