काठमाडौं । पूर्वप्रधानमन्त्री एवं नेपाली कम्युनिस्ट पार्टीका संयोजक पुष्पकमल दाहाल ‘प्रचण्ड’ले सरकार असफल भए त्यसको असर समग्र मुलुकमा पर्ने भन्दै चिन्ता व्यक्त गर्नुभएको छ ।
प्रतिनिधि सभाको बिहीवारको बैठकलाई सम्बोधन गर्दै उहाँले जनताको ठूलो आशा र अपेक्षाका साथ वर्तमान सरकार गठन भए पनि सुशासन, सामाजिक न्याय र आर्थिक समृद्धिका क्षेत्रमा अपेक्षाअनुसार काम हुन नसकेको बताउनुभयो ।
प्रचण्डले सरकारका पछिल्ला गतिविधिले नकारात्मक उदाहरण प्रस्तुत गरेको आरोप लगाउँदै सुकुम्वासी समस्या, ट्रेड युनियन अधिकार, विद्यार्थीका सवाल तथा भौगोलिक सीमा र राष्ट्रिय स्वाधीनताजस्ता संवेदनशील विषयमा सरकार गम्भीर नदेखिएको बताउनुभयो ।
उहाँले लगानी, उत्पादन, रोजगारी, पुँजीगत खर्च, राजस्व सङ्कलन, बजार विकास तथा कर प्रणालीलगायतका आर्थिक सूचकहरू सन्तोषजनक नरहेको दाबी गर्नुभयो । कर प्रणालीका कारण जनतामा त्रास सिर्जना भएको उल्लेख गर्दै उहाँले सरकारप्रति जनताको निराशा र चिन्ता बढ्दै गएको बताउनुभयो ।
‘अहिले पनि देशको राजनीति सहज भएको छैन । नेपाली जनताले आशा र अपेक्षाका साथ राष्ट्रिय स्वतन्त्र पार्टीलाई उल्लेखनीय जनमत दिएका थिए । सुशासन, सामाजिक न्याय र आर्थिक समृद्धिको पक्षमा ठोस काम हुने अपेक्षा जनतामा थियो,’ उहाँले भन्नुभयो ।
विगतका बेथिति र अराजकताप्रति राजनीतिक नेतृत्वले जिम्मेवारी लिनुपर्ने बताउँदै प्रचण्डले राम्रो कामको जस र नराम्रो कामको अपजस पनि नेतृत्वले नै लिनुपर्ने आफ्नो धारणा रहेको स्पष्ट पार्नुभयो ।
सरकारले आफ्ना सुझाव र आलोचनालाई गम्भीरतापूर्वक लिएर जनताको अपेक्षाअनुसार जिम्मेवार कदम चाल्ने अपेक्षा गरे पनि त्यसो हुन नसकेको उहाँको भनाइ थियो । पछिल्ला घटनाक्रमले जनतामा निराशा बढाएको र अवस्था विगतभन्दा पनि कमजोर हुने हो कि भन्ने आशंका उत्पन्न भएको उहाँले बताउनुभयो ।
संविधान कार्यान्वयनको विषयमा समेत सरकारको नियतमाथि प्रश्न उठाउँदै प्रचण्डले हजारौँको बलिदानबाट प्राप्त समावेशी लोकतन्त्र र संविधानलाई कमजोर पार्ने वा पुनर्लेखन गर्ने प्रयास भइरहेको त छैन भन्ने आशंका उत्पन्न भएको बताउनुभयो ।
उहाँले सरकारलाई जनताको आशा र अपेक्षाअनुसार काम गर्न तथा मुलुकको राजनीतिक, आर्थिक र सामाजिक अवस्थाप्रति गम्भीर बन्न ध्यानाकर्षण गराउनुभयो ।
