काठमाडौं । पूर्वप्रधानमन्त्री एवं नेपाली कम्युनिष्ट पार्टीका संयोजक पुष्पकमल दाहाल ‘प्रचण्ड’ले संविधान संशोधन र लोकतन्त्र सुदृढीकरणका नाममा सरकारले चालेका कदमले लामो संघर्ष र बलिदानबाट प्राप्त उपलब्धि कमजोर पार्न सक्ने आशंका व्यक्त गर्नुभएको छ ।
बिहीवार बसेको प्रतिनिधि सभाको बैठकमा बोल्दै अध्यक्ष दाहालले समावेशी लोकतन्त्रसहितको वर्तमान संविधानलाई पुनर्लेखन गर्ने वा कुनै बहानामा कमजोर पार्ने उद्देश्यले सरकार अघि बढेको हो कि भन्ने प्रश्न गर्नुभयो ।
उहाँले सरकारका पछिल्ला गतिविधिले लोकतन्त्र सुदृढीकरणको सट्टा मुलुक निरंकुशतातर्फ उन्मुख हुने हो कि भन्ने चिन्ता जनस्तरमा बढ्दै गएको बताउनुभयो ।
देशका विभिन्न भागमा भइरहेका विरोध प्रदर्शनलाई उल्लेख गर्दै दाहालले तराई–मधेसदेखि काठमाडौंको माइतीघर मण्डलासम्म लघुवित्त पीडित, दलित समुदाय तथा विभिन्न समूहका निरन्तर आन्दोलनले जनअसन्तुष्टि गहिरिँदै गएको संकेत गरेको बताउनुभयो ।
उहाँले सरकार शान्ति–सुरक्षा कायम गर्न, सुशासन दिन तथा जनताको आर्थिक विकास र समृद्धिको आकांक्षा सम्बोधन गर्न असफल भइरहेको टिप्पणी गर्नुभयो ।
‘यदि सरकारले शान्ति–सुरक्षा, सुशासन, आर्थिक विकास र जनताको अपेक्षा पूरा गर्न सकेन भने नेपाललाई असफल राज्यतर्फ धकेल्ने र ठूलो राजनीतिक दुर्घटनाको जोखिम बढ्ने सम्भावना रहन्छ,’ उहाँले भन्नुभयो ।
दाहालले आफूले सरकारमाथि आरोप लगाउन नभई गम्भीर चिन्ताका रूपमा विषय उठाएको स्पष्ट पार्दै मुलुकलाई असफल राष्ट्र बन्नबाट जोगाउन र सम्भावित राजनीतिक दुर्घटना रोक्न सरकारको ध्यानाकर्षण गराउनुभयो ।
