लन्डन । म्यानचेस्टर युनाइटेडले इंग्लिस प्रिमियर लिगमा मंगलबार राति बर्नलीलाई १–० ले हराएको छ । पउल पोग्बाले दोस्रो हाफमा गरेको गोलमा म्यानचेस्टर युनाइटेडले जित हात पार्न सफल रह्यो । यससँगै टोली अंक–तालिकाको शीर्ष स्थानमा उक्लिन सफल रह्यो । सन् २०१२ को डिसेम्बरयता म्यानचेस्टर अंकतालिकाको शीर्ष स्थानमा पुगेको यो पहिलोपल्ट हो ।
त्यस सिजन म्यानचेस्टरले एलेक्स फर्गुसनको नेतृत्वमा लिग जितेको थियो । म्यानचेस्टरको १७ खेलबाट ३६ अंक भएको छ । यो दोस्रो स्थानमा झरेको लिरभपुलभन्दा तीन अंकको अग्रता हो । मंगलबारको अर्को खेलमा एभरटनले उल्भ्सलाई २–१ ले हराई चौथो स्थानमा पुग्यो । उसको ३२ अंक भएको छ ।
गोल अन्तरले समान ३२ अंकसाथ लेस्टर सिटी तेस्रो स्थानमा छ । यस्तै सेफिल्डले सिजनको पहिलो लिग जित हात पार्न न्युकासल युनाइटेडलाई १–० ले हरायो । सेफिल्डको पाँच अंकसाथ अझै पुछारमा छ । सब्स्टिच्युट बिली सार्पले खेलको एक मात्र गोल गरे । लिगमा खेलेका १८ खेलमा सेफिल्डको यो पहिलो जित हो ।
